گاڤ

وه‌زیرێ كاره‌با حكومه‌تا هه‌رێما كوردستانێ بۆ گاڤ راگه‌هاند، ل ده‌مه‌كێ نێزیك به‌رهه‌مئینانا كاره‌بێ دێ گه‌هیته‌ چار هزار مێگاواتان و ئاشكراكر، ل پارێزگه‌ها دهۆكێ زێده‌تر ژ 14 ده‌مژمێران رۆژانه‌ كاره‌ب هه‌یه‌.

كه‌مال محه‌مه‌د، وه‌زیرێ كاره‌بێ یێ حكومه‌تا هه‌رێما كوردستانێ بۆ گاڤ گۆت: ل 26ى 9 كێشه‌یه‌ك ل گه‌ل دانا غاز هه‌بوو و غازا خۆ كێمكربوو و تا نه‌هى ڤێ مه‌هێ ئه‌و غازا پێدڤى نه‌دهاته‌ دابینكرن و كێشه‌یه‌كا دارایى دناڤبه‌را وه‌زاره‌تێ و كۆمپانیێ دا هه‌بوو و نوكه‌ ئه‌و رێژه‌یا به‌رده‌ست سێ هزار و 500 مێگاواتێن كاره‌بێ ل سه‌رانسه‌رى هه‌رێما كوردستانێ دهێنه‌ به‌رهه‌مئینان.

كه‌مالى هیڤى ژى خواست ل ده‌مه‌كێ نێزیك به‌ره‌ف چار هزار مێگاواتان بچن و به‌رهه‌مئینانا كاره‌بێ به‌ر ب باشتره‌ ژ جاران.

وه‌زیرێ كاره‌بێ دیاركر، كێشه‌یا دارایى ل گه‌ل كۆمپانیا دانا غاز هاتیه‌ چاره‌كرن و نوكه‌ غاز بۆ وه‌ستگه‌هێن كاره‌بێ دهێته‌ دابینكرن.

محه‌مه‌د دیاركر، وه‌ك رێژه‌ ل پارێزگه‌ها دهۆكێ 14 بۆ 15 ده‌مژمێران كاره‌ب هه‌یه‌ و 57 هزار پشكدارێن پریپه‌ید ل سه‌رانسه‌رى هه‌رێما كوردسانێ هه‌نه‌ كو 10 هزار و 700 پشكدار ل پارێزگه‌ها دهۆكێ نه‌‌ و پڕۆژه‌ به‌ره‌ف ناڤا خه‌لكى ژى چوویه‌ و ل ده‌ڤه‌رداریا ئامێدیێ ده‌ستپێكریه‌.