گاڤ

به‌رپرسه‌كێ وه‌زاره‌تا ده‌رڤه‌ یا ئه‌مریكا دبینیت كو بێنیامین نه‌ته‌نیاهۆ سه‌رۆكوه‌زیرێ ئسرائیلێ زیان گه‌هاندیه‌ ناڤوده‌نگێن ئه‌مریكا ژ بۆ بهێزكرنا ئه‌جێندایێن خۆ یێن كه‌سۆكى.

ل گۆره‌ى مالپه‌رێ هافینگتۆن پۆست یێ ئه‌مریكى، وى به‌رپرسێ ئه‌مریكى گۆتیه‌ "ئه‌ڤه‌ چركه‌یه‌كا گرنگه‌ د دیرۆكێ دا و پێدڤیه‌ ئه‌م ژ وێ رێكا نه‌ته‌نیاهۆى پێ زیان گه‌هاندیه‌ ناڤوده‌نگێن ئه‌مریكا ژ بۆ بهێزكرنا ئه‌جێندایێن خۆ یێن كه‌سۆكى تۆڕه‌ ببین".

ئه‌و به‌رپرسێ ئه‌مریكى دبینیت كو كارتێكرنێن لاوه‌كى یێن شه‌ڕێ ئسرائیلێ ل سه‌ر غه‌زه‌ ل سه‌ر ئێمناهیا ئه‌مریكا د خرابن.

زێده‌ ژى كریه‌ "ئه‌و هه‌وا نوى یا ل كه‌رتێ غه‌زه‌ یا خویناویتره‌ ژ هێرشا به‌رێ یا ل باكۆرێ كه‌رتێ غه‌زه‌ رویداى".

ئاماژه‌ ب وێ چه‌ندێ ژى كریه‌ "رێكخراوێن مرۆڤایه‌تى د نوكه‌ دا پتر ژ هه‌مى ده‌مێن دى هوشدارى ژ ره‌وشێ داینه‌".

هه‌ر ژ رۆژا 7ى ئوكتۆبه‌رێ شه‌ڕێ حه‌ماس و ئسرائیلێ به‌رده‌وامه‌ و تێدا پتر ژ 17177 فله‌ستینیان هه‌روه‌سا 1200 ئیسرائیلیان گیانێ خۆ ژده‌ستداینه‌ و 46 هزار فله‌ستینى و ژماره‌یه‌كا ئسرائیلیان بریندار بووینه‌، ل رۆژا 24ى هه‌یڤا بۆرى هه‌ردو لایه‌نێن شه‌ركه‌ڕ ئاگربه‌ست راگه‌هاند بوون، لێ پشتى حه‌فت رۆژان جاره‌كا دى شه‌ڕ ده‌ستپێكربووڤه‌.