گاڤ

د ده‌هـ هه‌یڤان دا ئیراقێ ب بهایێ نزیكى 8 ملیار دۆلاران به‌رهه‌م و كه‌لوپه‌لێن نه‌ گرێداى په‌ترۆلێ یێن ئیرانى هاورده‌كرینه‌ و ب ڤێ چه‌ندێ دوه‌م مه‌زنترین هاورده‌كارا به‌رهه‌مێن ئیرانى یه‌.

ده‌ستهه‌لاتێن بازرگانى یێن ئیرانى ئه‌ڤرۆ شه‌مبیێ راگه‌هاندن؛ ئیراقێ هه‌ر ژ 21ى ئادارا 2023 هه‌تا 21ى كانوینا دوێ یا 2024 ب بهایێ نزیكى 8 ملیار دۆلاران كه‌لوپه‌ل و به‌رهه‌مێن نه‌په‌ترۆلێ یێن ئیرانى هاورده‌كرینه‌.

ئاشكرا ژى كریه‌؛ ئیراق بۆ هاورده‌كرنا به‌رهه‌مێن نه‌په‌ترۆلێ یێن ئیرانى ل رێزا دوێ د رێزبه‌ندییا وه‌لاتان دا د ماوه‌یێ ده‌هـ هه‌یڤان دا هات.

دیار ژى كریه‌؛ بۆ هاورده‌كرنا به‌رهه‌مێن ئیرانى، چین ل رێزا ئێكێ ب بهایێ 11.5 ملیار دۆلاران، ئیراق ل رێزا دوێ ب بهایێ 7.7 ملیار دۆلاران، ئیمارات ل رێزا سیێ ب بهایێ 5.2 ملیار دۆلاران، توركیا رێزا چارێ ب بهایێ 5 ملیار دۆلاران و هند ل رێزا پێنجێ ب بهایێ 1.8 ملیار دۆلاران هاتن.

ئاماژه‌ ب وێ چه‌ندێ ژى كریه‌ "ئیرانێ د ده‌هـ هه‌یڤان دا نزیكى 113 ملیۆن ته‌نێن به‌رهه‌مێن نه گرێداى ‌په‌ترۆلێ ب بهایێ 40.5 ملیار دۆلاران هنارده‌ى ده‌رڤه‌ كرینه‌".