پهرلهمانتارهك: پشتى جهژنێ دێ سهرۆكهكێ نوى بۆ پهرلهمانێ ئیراقێ هێته ههلبژارتن
بەلاڤ بکە
گاڤ
فراكسیۆنا تهقهدوم د پهرلهمانێ ئیراقێ دا راگههاند؛ پشتى جهژنێ دێ ههلبژارتنا سهرۆكهكێ نوى بۆ پهرلهمانى هێته ئێكلاكرن ههڤدهم دوباره پێداگیرى ل سهر بهربژارێ خۆ بۆ پۆستێ سهرۆكێ پهرلهمانى كر.
پهرلهمانتار بورهان ناسر ژ فراكسیۆنا تهقهدوم ئهڤرۆ دوشهمبیێ بۆ گاڤ راگههاند "گۆتوبێژ دناڤبهرا فراكسیۆنێن سیاسى و چارچووڤهیێ ههماههنگیێ دا ل دۆر ههلبژارتنا سهرۆكێ پهرلهمانى د بهردهوامن، ئهڤ دانوستاندنه پشتبهستنێ ل سهر ئیستیحقاقێن ههلبژارتنان دكهن ئهوێن كو حكومهتا سهرۆكوهزیر محهمهد شیاع سوودانى ل گۆرهى وێ هاتیه پێكئینان".
ناڤهاتى دیار ژى كر "فراكسیۆنا تهقهدوم د پهرلهمانى دا، مافێ دهستنیشانكرنا بهربژارهكێ بۆ پۆستێ سهرۆكێ پهرلهمانى ههیه".
ئاشكرا ژى كر "پشتى جهژنێ دێ سهرۆكهكێ نوى بۆ پهرلهمانى هێته ههلبژارتن".
ئاماژه ب وێ چهندێ ژى كر "پهرلهمانتار شهعلان كرهیم تا نوكه بهربژارێ تهقهدوم بۆ پۆستێ سهرۆكێ پهرلهمانى یه، ههر كهسایهتییهكا تهقهدوم و چارچووڤهیێ ههماههنگیێ ل سهر رێكبكهڤن چ زیان نینن كو پۆستێ وهربگریت".
جڤاتا نوینهرێن ئیراقێ تا نوكه نهشیایه سهرۆكهكێ نوى بۆ پهرلهمانى ل جهێ محهمهد رێكان حهلبووسى بههلبژێریت ئهوێ كو ب بڕیارا دادگهها فیدرالى ئهندامهتییا وى د پهرلهمانى دا هاتیه ب دویماهیك ئینان.
