گاڤ

وه‌زاره‌تا باژێڕڤانى و گه‌شتیارى یا حكومه‌تا هه‌رێما كوردستانێ ئاماده‌كارى بۆ به‌لاڤكرنا پارچه‌زه‌ڤییان ب سه‌ر فه‌رمانبه‌رێن هه‌رێما كوردستانێ دا ده‌سپێكرن.

به‌رى چه‌ند رۆژه‌كا مه‌سروور بارزانى، سه‌رۆكێ حكومه‌تا هه‌رێما كوردستانێ بڕیار دابوو پارچه‌یێن ئه‌ردى ب سه‌ر وان فه‌رمانبه‌ران و مووچه‌خۆران دا بهێنه‌ به‌لاڤكرن یێن ژ حكومه‌تێ مفادار نه‌بووین.

ئه‌ڤرۆ ب سه‌رپه‌رشتییا ساسان عه‌ونى، وه‌زیرێ باژێڕڤانى و گه‌شتیارییا حكومه‌تا هه‌رێما كوردستانێ كۆمبوونه‌كا به‌رفه‌رهـ وه‌ك ئاماده‌كارى بۆ بجهئینانا بڕیارێ و به‌لاڤكرنا پارچه‌ زه‌ڤیان هاته‌كرن.

ساسان عه‌ونى، وه‌زیرێ باژێڕڤانییان راگه‌هاند، به‌لاڤكرنا پارچه‌زه‌ڤییان بۆ فه‌رمانبه‌ران دێ مفایه‌كێ گه‌له‌ك باش هه‌بیت و دێ كارتێكرنێ ل سه‌ر ئابۆرى و لڤینا بازارى و گه‌شپێدانا سنۆرێن باژێڕڤانییان ژى كه‌ت.

وه‌زیرێ باژێڕڤانییان ئاماده‌بوویێن كۆمبوونێ راسپاردن كو ب زووترین ده‌م ده‌ست ب ئاماده‌كاریێن دابینكرنا زه‌ڤییان بكه‌ن و د ده‌مه‌كێ دیاركرى دا رێكاران ته‌مام بكه‌ن بۆ وێ یه‌كێ ژ بڕیارا حكومه‌تێ مفادار بن و ببنه‌ خودان پارچه‌یێن ئه‌ردى، هه‌روه‌سا ئاماژه‌ دا وێ ژى كو پێدڤییه‌ ژماره‌یا ته‌خمینكرى یا فه‌رمانبه‌ران بهێته‌ زانین و ل سه‌ر وى بنه‌مایى زه‌ڤى بهێنه‌ به‌لاڤكرن.

عه‌ونى ل دۆر نه‌خشێ ئه‌ردى ژى ئاشكراكر، دڤێت ماسته‌ر پلان ل به‌ر چاڤ بهێنه‌ وه‌رگرتن و پانییا جادده‌یان و جهێن كه‌سكاتیێ و خزمه‌تگۆزاریێن گشتى و ئالیێ باژێڕى و كه‌سكاتیێ گرنگى پێ بهێته‌دان، هه‌روه‌سا دیاركر ژى ل سنۆرێ هه‌ر ماسته‌رپلانه‌كێ ئه‌گه‌ر ئه‌ردێ به‌رده‌ست نه‌بوو، دڤێت سنۆرێ باژێڕڤانییان بهێته‌ به‌رفره‌هـكرن و ئه‌رد بۆ فه‌رمانبه‌ران بهێته‌ دابینكرن.

هه‌ر د كۆمبوونێ دا لژنیه‌كا تایبه‌ت ل سنۆرێن باژێڕڤانییان هاته‌ دروستكرن، بۆ وێ یه‌كێ پرۆسه‌یا به‌لاڤكرنا پارچه‌زه‌ڤیان ب له‌ز و ب باشترین شێوه‌ ب رێڤه‌بچیت.