پلاسخارت: بێى پشكدارییا پارتى د هه‌لبژارتنان دا پرۆسه دێ ب زه‌حمه‌ت كه‌ڤیت
بەلاڤ بکە
گاڤ
سه‌رۆك بارزانى، ل گه‌ل جێنین پلاسخارت، نوینه‌را تایبه‌ت یا سكرتێرێ گشتى یێ نه‌ته‌وه‌یێن ئێكگرتى كۆمبوو، جێنین پلاسخارت د كۆمبوونێ دا راگه‌هاند، ئه‌م ئاگه‌هدارین ئه‌ڤه دو سالن پارتى ئاماده‌یه هه‌لبژارتن د ده‌مێ خۆ دا بهێنه كرن و د دلگرانییا پارتى د گه‌هین.
ئه‌ڤرۆ چارشه‌مبێ 3-4-2024ێ سه‌رۆك بارزانى ل گه‌ل جێنین پلاسخارت، نوینه‌را تایبه‌ت یا سكرتێرێ گشتى یێ نه‌ته‌وه‌یێن ئێكگرتى كۆمبوو، د دیدارێ دا ره‌وشا سیاسى و ناڤخۆ و هه‌لبژارتنێن هه‌رێما كوردستانێ هاتنه به‌حسكرن، جێنین پلاسخارت زێده‌بارى ئاماژه ب رۆلێ سه‌رۆك بارزانى و پارتى د پرۆسه‌یا سیاسى یا ئیراق و هه‌ریما كوردستانێ دا كر، ئاماژه دا وێ یه‌كێ كو ئه‌و ئاگه‌هدارن ئه‌ڤه دو سالن پارتى ئاماده‌یه بۆ هه‌لبژارتنان د ده‌مێ خۆ دا و نوكه ژى د دلگرانییا پارتى د گه‌هن، دوپاتكر ژى پێدڤیه پارتى پشكداریێ د هه‌لبژارتنان دا بكه‌ت و بێى پارتى پرۆسێسا برێڤه‌چوونا هه‌لبژارتنان دێ یا ب زه‌حمه‌ت بیت.
ژ ئالیێ خۆ ڤه سه‌رۆك بارزانى ئه‌گه‌رێن هه‌لوه‌ستێ پارتى رۆنكرن و دیاركر، دادگه‌ها فیدرال جهێ ده‌ستهه‌لاتا یاسادانانێ گرتیه و بڕیارێنن وێ سیاسینه، ب شێوه‌یه‌كى نینن رێزێ ل قه‌واره‌یێ هه‌رێما كوردستانێ بگریت، سه‌رۆك بارزانى ئاماژه دا وێ یه‌كێ ژى كو بێبه‌هركرنا پێكهاتان كو نوینه‌رایه‌تییا خۆ بكه‌ن زیانه‌كه مه‌زن ب پرۆسێسا پێكڤه‌ژیانێ دگه‌هینیت، كو گه‌لێ كوردستانێ ده‌هان ساله بۆ وێ یه‌كێ خه‌باتێ دكه‌ت، په‌ڕله‌مانه‌كى نه‌ته‌وه‌یێن دى تێدا نه‌بن په‌ڕله‌مانه‌كێ له‌نگه و نه‌یێ ته‌مامه.
هه‌روه‌سا سه‌رۆك بارزانى د درێژاهییا گۆتنێن خۆ دا دوپاتى ل برێڤه‌چوونا برێڤه‌چوونا هه‌لبژارتنان كر و گۆت: به‌لێ هه‌لبژارتنه‌ك كو ده‌ربڕینێ ژ ئیراده‌یا گه‌لێ كوردستانێ و ئازادى و شه‌فافیه‌تێ بكه‌ت و دویر بیت ژ ده‌ستوه‌ردانێن ده‌ره‌كى و دیزاینا پێشوه‌خت یا ده‌رئه‌نجامان.
هه‌ر د كۆمبوونێ دا سه‌رۆك بارزانى دیاركر كو ل هه‌رێمێ پارتى دامه‌زرێنه‌را شه‌رعیه‌ت و هه‌لبژارتنان بوویه و ل سالا 1991ێ ل كۆیه راگه‌هاندیه، كو پێدڤیه ژ شه‌رعییه‌تا شۆڕشگێرى به‌ره‌ف شه‌رعییه‌تا قانوونى بچین، به‌حس ل ره‌وشا ئیراقێ كر و د یاركر، ل ئیراقێ رێككه‌فتننامه دهێنه بنپێكرن و بۆ پێكئینانا حكومه‌تا ئیراقێ مه رێككه‌فتن ل گه‌ل ئالیێن سیاسى ل ده‌ما پێكئینانا هه‌ڤپه‌یمانییا ئیداره‌یا ده‌وله‌تێ هه‌بوو، تا نوكه ژى چ ژ خالێن وێ رێككه‌فتنێ نه‌هاتینه بجهئینان، ل گه‌ل ڤێ یه‌كێ ژى ل به‌غدا ب شێوه‌یه‌كى نه‌ده‌ستوورى ده‌ست بۆ ژیانا خه‌لكێ هه‌رێما كوردستانێ هاتیه برن و مووچه و قووتێ خه‌لكێ كوردستانێ وه‌ك چه‌كه‌كى بۆ تێكدانا سه‌قامگێرییا هه‌رێمێ و بێزاركرنا خه‌لكێ كوردستانێ بكارئینایه.
هه‌ر د كۆمبوونا ل گه‌ل پلاسخارتێ دا سه‌رۆك بارزانى ب پێدڤى زانى بۆ برێڤه‌چوونا هه‌لبژارتنه‌كا پاقژ و شه‌فاف كێشه‌یێن ته‌كنیكى بهێنه چاره‌كرن و ل ژێر چاڤدێرییا كۆمه‌لگه‌ها نێڤده‌وله‌تى هه‌لبژارتن بهێنه كرن.
د پشكه‌كا دى یا روینشتنێ دا نوینه‌را تایبه‌ت یا سكرتێرێ گشتى یێ نه‌نه‌وه‌یێن ئێكگرتى ب سه‌رۆك بارزانى راگه‌هاند، كێشه‌یا مووچه‌یى د راپۆرتێن خۆ یێن جڤاتا ئاساییشێ دا به‌حسكرینه و نابیت جوداهى د ناڤبه‌را فه‌رمانبه‌رێن هه‌رێما كوردستانێ و پارچه‌یێن دى یێن ئیراقێ دا هه‌بیت و د بزاڤێن وێ یه‌كێ داینه بابه‌تێ مووچه‌یى و مافێن دارایى یێن خه‌لكێ هه‌رێما كوردستانێ ل گه‌ل حكومه‌تا ئیراقێ به‌حسبكه‌ین و هه‌روه‌سا پێشنیاز ژى كریه بۆ بابه‌تێ هه‌لبژارتنان تیمه‌كێ نه‌ته‌وه‌یێن ئێكگرتى هاریكار بیت بۆ چاره‌كرنا كێشه‌یێن ته‌كنیكى یێن پارتى تێبینى ل سه‌ر هه‌یى.
هه‌ر دو ئالییان دوپاتى ل وێ یه‌كێ كر كو بۆ پاراستنا پرۆسه‌یا دیمۆكراسى و سه‌قامگێرییا هه‌رێمێ پێدڤیه ئه‌و كێشه‌یێن ل هه‌مبه‌رى برێڤه‌چوونا هه‌لبژارتنان بهێنه چاره‌كرن.
