گاڤ

ئەڤرۆ ب فەرمی ژڤانێ دەستپێکرنا یاریێن جاما یانەیێن کەنداڤی و یانەیێن تێدا پشکدار هاتنە راگەهاندن.

ل گۆرەی راگەهاندنا فدراسیۆنا  فۆتبۆلا کەنداڤی، جاما یانەیێن کەنداڤی ل رۆژا 24/9/2024 دێ دەستپێکەت و ل رۆژا 25/4/2025 دێ بدویماهی هێت.

هەروەسا هاتیە، هەشت یانە دێ تێدا پشکداربن و ل سەر دو گرۆپان هێنە دابەشکرن و سەرکەفتیێن هەردو گرۆپان ئێکسەر دێ گەهنە قووناغا بەری دویماهیێ.

هەر ئێک ژ یانەیێن دهۆک، نەسرا ئیماراتی، ئتیفاقێ سعوودی، عەرەبی یا قەتەری، رەفاع یا بەحرەینی، قادسیە یا کوێتی، ئەهلی سەنعا یا یەمەنی و زەفارا عومانی پشکداری جامێ بووینە و ل دویماهیا هەیڤا هەشت دێ پشککێشان هێتەکرن.

ئەگەر هەردو یانەیێن ئتیفاقا سعوودی و عەرەبی یا قەتەری کەفتنە د گرۆپێ یانەیا دهۆکێ دا، مارکۆ ڤیراتیێ ئیتالی وەک یاریکەرێ یانەیا قەتەری و ستیڤن جێرارد، وەک راهێنەرێ یانەیا سعوودی دێ هێنە دهۆکێ، ژ بەرکو یاری دێ ب شێوازێ هاتن و چوون هێنەکرن.