رزگار بوویێن دەستێ داعش و چارەنڤیسێ وان بەرەف ئاقارەکێ نەدیار!!
بەلاڤ بکە
دێرین خدر
چالاکڤان
ھەر ژ دەستپێکا هه‌بوونا مرۆڤایەتییێ و تا نھا ل دەمێ دروستبوونا ھەر شەرەکی ئەو چینا لەواز چ ژ ئالیێ جەستەی و جڤاكى یان ژى ئۆل ب پله ئێك د بنه قوربان.
ئێزدی ب درێژاهییا دیرۆکێ تووشی چەندین کۆمکوژیان و فەرمانان بووینە جارەک وەک کورد جارەک وەک ئۆل، ئەوا ل 2014 چێبووى سه‌رسورمانه‌كا مەزن بوو بۆ مه ئێزدییان ژبه‌ركو د ھەمان چرکە دا بەلاڤ بوو کو چ دقەومت بۆ دەمەکی ھەموو جیھان بێدەنگ بوو، لەوا ژمارا قوربانییان زێدەتر بوو، ھاتنا داعش بۆ شنگالێ ل سەردەمێ تەکنەلۆژیا و ڤێ پێشكه‌فتنێ شەرمەزارییە بۆ مێژوو و مرۆڤایەتییێ، ب مخابنی ڤە ھەتا ئیرۆ ئێزدیێن شنگالێ د ژیان و ژیارەکا دژوار دا دژین!
10 سال ل سەر وێ کۆمکوژیا دلتەزێن دەرباز دبن کو روو ب رووی خەلکێ مە یێ شنگال بووی، ب مخابنی ڤە کریارێن ھنده‌ك نە مرۆڤان بەرامبەر شنگال ھاتن کرن کو زمانێ من ئەو ھێزە نینە ب درێژی بەحس ژێ بکەت، وەک ھەردەم ژن و زارۆک قوربانییێن ھەرە مەزنن، ئەڤە ماوێ 10 سالانه مە گەلەک بەحس ل وان چیرۆکێن تراژیدی کرینە یا ب سەرێ خەلکێ شنگال ب گشتی و تایبەت ژی کچ و ژنان ھاتی، بەلێ لڤێ جارێ من دڤێت بەحسێ چارەنڤیسێ وان بکەم بەرەف کێدەر؟!
رەوشا دەروونی یا رزگاربوویان زێدە خرابە ژبەرکو ھەر ئێک ژوان نە تنێ چیرۆکەکا تراژیدی ھەیە، ل ده‌ما د ده‌ستێ هۆڤێن داعش دا، بەلکو چەندین چیرۆک ھەبووینە، پشتی چەندین جاران یاری ب ھەستێن وان ھاتینە کرن وەک کالایەکێ بێ بوھا چەندین جاران کڕین و فرۆشتن ب وان ھاتینە کرن، پشتی ڤەگەڕیانا وان ب ھەر شێوه‌یه‌كى و زڤرینە ناڤ خێزانێن خۆ ئەرێ چەوانیا سەرەدەریکرنا خێزانێ ل گەل وان، جڤاکی دگەل وان ل وی ئاستی بوویە کو ھاریکاریا وان بکەت بارێ وانێ دەروونی باش ببت یان نە!! ئەرێ ئەو ژینگەھا تێدا دژین ھاریکار بوویە کو ھەست ب ئێمناھییێ بکەن یان نە؟! ئەرێ ساخلەمییا وان یا لەشی ھاریکارە بکارن وەک مرۆڤەک ئاسایی بژین یان نە؟! ئەڤ پرسیارە و چەندین پرسیارێن دی کو بێ بەرسڤ ماینە! ، ئەگەر بێژن سەنتەرێن باشکرنا دەروونی ھەنه، ئەڤه بتنێ به‌س نینه كو ئه‌و ره‌وشا ئه‌و تێدا ژێ رزگار ببیت، چونكى پشتی ژ ڤی سەنتەری ڤه‌دگه‌ڕته مال مالا رزگاربووی بتنێ چادرەکە! بۆ ماوێ چەند سالانە ژیانێ بن چادرەکێ دا دبۆرینیت، ژ گەرمێ و سه‌رمایێ ژ ئاگرێ ب خیڤه‌تان د كه‌ڤیت،ئه‌ڤ یه‌كه ژى دێ بارێ وێ یێ دەروونی خرابتر لێکەت، گەلەک ژوان رزگار بوویان زارۆک بوون ده‌مێ کەفتینە دەست تیرۆرستێن داعشێ، ئەرێ پشتی ڤەگەڕاندنا وان کەسێن بسپۆر ئیناینە کو چه‌وا مەژیێ وى زارۆکی پاقژ بکەنەڤە ژ وان ھزرێن ترسناک یێن داعشان؟! ئەرێ ئەو کچا ڤه‌دگه‌ڕیت پشتی چەندین جاران کریارێن ب زۆری یێن سێکسی ل گەل ھاتینه کرن ژینگەھەکا وەسا ئارام بۆ وێ کچێ به‌رهه‌ڤ بوویه كو د ناڤا كۆمه‌لگه‌هه‌كا نێر دا و كو پترییا وێ ژنێ وه‌ك له‌ش دبینن، وه‌سا ل وێ کچێ ئانکو ژنێ نەکەن بەرەف خۆ کوشتێ بچیت ؟! بەلکی ل بەرچاڤ خۆشترین و جوانترین ژینگەهـ بۆ وێ بهێته دابینكرن، بەلێ ئەرێ ب راستی وه‌سایه؟! ئەرێ ئەو رزگار بوویین برینە دەرڤەی وه‌لاتی براستی چارەسەریە ئانکو تنێ ئازار شکاندنەکا دەمکییە بۆ ده‌مه‌كێ کورت وەک بەرێ و خراپتر ل رەوشا وانا دەروونی بهێت، ئەگەر راستگۆ بین ھەر مرۆڤەک دووری وه‌لاتێ دایكێ بیت ئەگەر تووشی چ رەوشێن خراب ژی نه‌ببت، رەوشا وان یا دەروونی تێک دچت ژبەر دووریا ئاخێ و کەس و کاران ئەڤجا ئەگەر ئەو کەسە قوربانی بت دێ چ ل رەوشا وی ھێت؟!
ئەگەر بێینە سەر برینێن لسەر لەشێ وان رەنگە گەلەک ژوان پشكه‌كا لەشێ خۆ ژ دەست دابت ئەرێ ئەو جھێ تێدا دژیت ھاریکارە بکارت وەک مرۆڤەک ساخلەم ژیانێ بکەت بۆ نموونە کەسەک بریندارە سەر کورسیەکێ یە ئەرێ ئەو جادا مالا وی ئانکو چادرا وی لێ، یا راستە ھەتا بکارت بێی ھاریکارییا ھیچ کەسەکی بهێت و بچیت؟! ئەرێ ئەو ژنا ب کۆمەکا زارۆکان ڤە زڤری بەلێ ھەڤژینێ وێ شەھید بووی داھاتەکی وەسا ھەیە بکارت بێی کو بچت بتە کرێکارەک دناڤا بستانەکێ پیڤازان یان پتاتان دا زارۆكێن خۆ مەزن بکەت و ره‌وانه‌یى قوتابخانێ بكه‌ت !! ئەڤ پرسیار و چەندین پرسیارێن دیتر بێ بەرسڤن!!
نه‌یا رەشبینم، چنکو ھندەک نمونێن جوان ژی مە هه‌نه پشتی زڤرین خێزانێن وان ب دل و جان پشتەڤانیا وان کرینە و زڤرینە سەر خواندنا خۆ و زانکۆ ژی خلاس کرن ئەوا ب سەری ھاتی بوو ھێز بۆ وێ کەسێ چونكى پشتەڤانی ھاتە کرن، مە رزگار بوو ھەنە بووینە خودان کارێن خۆ چونكى خێزان ھاریکار بوویه،مخابن ژمارەکا کێمن ئەو رزگاربوویێن کو ژیانا وان باش بووى ب ھاریکارییا خێزان و ده‌وروبه‌رێن خۆ، ئەگەر ھاتوو خێزان پشت بت جڤاک ژی دێ پشتەڤان بت کەس جورئەت ناکەت وی رزگاربووی بشکێنیت، ھیڤیا من ئەوە رۆژەک بهێت ئەو کچ و ژنێن ماین ژی بزڤرنە ناڤ خێزانێن خۆ ب سلامەتی ھیچ به‌هانه‌یه‌ك نەبتە رێگر ھەتاکو نەزڤڕت! ئومێدەوارم ئەو گۆڕێن ب کۆم بهێنە هه‌لدان و ھەر خێزانەک رووفاتێن خۆ وەرگرت و ل رۆژین جەژنا بکارن بچنە سەر گۆڕێن وان، دا بچەک خەمێتن وان کێم بن .