له‌یلا عه‌بدولجه‌بار

نێچیرڤان بارزانى، سه‌رۆكێ هه‌رێما كوردستانێ بۆ ده‌هـ سالێن یادا جینۆسایدا كوردێن ئێزدى یاده‌كێ ل هه‌ولێرێ رێكدئێخیت و بۆ جیهانێ ژى ل بیر دئینیت.

ده‌هـ سالان به‌رییا نوكه‌ كوردێن ئێزدى ل شنگال و ره‌خودۆرێن وێ هاتنه‌ جینۆسایدكرن، ژبلى وێ ژى ل گۆڕه‌یى داتایێن فه‌رمى 6 هزار ئێزدى هاتنه‌ ره‌ڤاندن، به‌لێ سه‌رۆكێ هه‌رێما كوردستانێ ب رێكا نڤیسینگه‌ها تایبه‌ت ب ئازادكرنا ره‌ڤاندییان ژ 2014ێ تا 2024ێ نێزیكى 4 هزار ئێزدییان رزگاركرینه‌.

بزاڤێن سه‌رۆكێ هه‌رێما كوردستانێ بۆ بنێڤده‌وله‌تیكرنا ناساندنا كه‌یسا ئێزدییان وه‌ك جینۆساید به‌رده‌وامه‌ و سه‌ركه‌فتى بوویه‌، ب رێكا كاركرنا تیمێ سه‌رۆكایه‌تییا هه‌رێما كوردستانێ ل گه‌ل كۆمه‌لگه‌ها نێڤده‌وله‌تى ل ئاست جیهانێ ئه‌ڤ كه‌یسه‌ كار ل سه‌ر كریه‌ و نه‌ته‌وه‌یێن ئێكگرتى ژى ئه‌ڤ كه‌یسه‌ ب فه‌رمى وه‌رگرتییه‌ و كۆمكوژى و شه‌هیدكرنا ئێزدییان ب جینۆساید ناساندیه‌.

په‌ڕله‌مانێ بریتانیا، ئه‌لمانیا و هنده‌ك وه‌لاتێن دى ژى قڕكرنا ئێزدییان ب فه‌رمى ب جینۆساید ناساندیه‌  و گه‌له‌ك وه‌لات نوكه‌ به‌رهه‌ڤییان بۆ ڤێ یه‌كێ دكه‌ن.

نوكه‌ بزاڤێن سه‌رۆكێ هه‌رێما كوردستانێ به‌رده‌وامى هه‌یه‌ بۆ پشته‌ڤانیكرنا ڤێ كه‌یسێ ل سه‌ر ئاستێ نێڤده‌وله‌تى و ئه‌ڤرۆ ژى د رێوره‌سمێ ل بیرئینانا جینۆسایدا ئێزدییان دوپاتى ل سه‌ر پشته‌ڤانیێ ل سه‌ر ئاستێ نێڤده‌وله‌تى كر.

هه‌ڤده‌م ل سه‌ر ئاستێ ئیراقێ، سه‌رۆكێ هه‌رێما كوردستانێ رێككه‌فتنا شنگالێ خستییه‌ سه‌ر مێزێ ئیراق و حكومه‌تا وێ و ب گرنگ ژى دزانیت رێككه‌فتنا شنگالێ بهێته‌ بجهئینان و ئه‌و رێككه‌فتن دێ ئێزدییان بۆ ده‌ڤه‌رێن وان ڤه‌گه‌ڕینیت.

هه‌ڤده‌م سه‌رۆكێ هه‌رێما كوردستانێ هه‌رده‌م پشته‌ڤانییا ئێزدییان كریه‌ كو كۆچ نه‌كه‌ن به‌لكو هه‌رێما كوردستانێ ب جهێ وان یێ دایكێ ناڤكریه‌.