سەردار هێتوتی

هێزا چاپەمەنیێ، پشتی شۆڕەشا میدیا جڤاکی، خۆ د قۆلاچکێن تاری دا ل هەرێما کورستانێ دبینیت، خوینەرێ ڕۆژنامە و گۆڤار و بەڵاڤۆک و پڕتووکێ چوویە د ئاستێ مرنێ دا.

ئەڤە د دەمەکی دایە ب هەڤبەرکرن دگەل وەڵاتێن هەرێمی و نێڤدەولەتی، گەلەک ژ مێژە ئەم یێن بووینە بەتالێن ڤان شاشیێن جڤاکی بێی کو لدویڤ زانیاریێ یان ژی سەر ڕاستیا بابەتی بگەرین، بەلکو ب تەنێ کارێ پتریا خەلکی بوویە مژویلکرن و بووراندنا دەمێن خۆ.

دپرسین: بۆچی بزاڤا چاپکرنێ و چاپەمەنیێ ل کوردستانێ و ب تایبەت ل دهۆکێ بەرەڤ پاشڤەچوویە؟ ئایا ئەوا د ناڤا ڕۆپەلێت ڕۆژنامە و کۆڤارا دا دهاتە نڤیسین بەهرا تێرکرنا هۆش و مێشکێ ڤێ دەڤەرێ نەدکر؟ ڕێڤەبەرێت سازیێن چاپەمەنیێ کەسێت ڤاڵانە ژ زانین و مەعریفا سەردەم؟ و گەلەک پسیارێت دیتر...
ڕاستە ب هەڤبەرکرنا دهۆکێ دگەل هەر دوو پارێزگەهێن دیتر ل باشوور، دیاردبیت کو زێدە گرنگی ژلایێ ناڤەندێن ڕێڤەبەر یێن ڤێ بزاڤێ د دەما بووری دا ب دهۆکێ نەهاتیەدان و ئەڤ ناڤەندە مایە د کراسێ خۆ یێ هەژاریێ دا، لێ خۆدانیێن دهۆکێ بخۆ ژی گرنگی ب ماڵا خۆ نەدایە، وان ب چاڤەکێ بێبهابوونێ ل ڤێ بزاڤێ نێرییە، کەسێن لسەر زکێ دهۆکێ دەولەمەندبووی، یاری ب لەشێ وێ کرینە و نەهێلانە خەمل و کۆکا وێ جانتر دەرکەڤیت و ب تنێ سیاسەتا مژینا گۆهانێن چێلەکا شیردەر بۆ دهۆکێ بکاربرییە، دەولەمەند و دەولەتدارێن دهۆکێ ژبلێ بزاڤەکا کێم نەبیت ئەڤ باژێرە لسەر ڕهێن وێ هشککریە.

لەوما بزاڤا چاپکرنێ یا مری هەر ژ مێژە، خەلک و خوینەر ژی کو تەخێن ناڤینن د دەمێ بزاڤا خۆرت یا چاپەمەنیێ دهۆک وەک ناڤەندەکا دێم دیتی یە و هەتا نوکە ژی یا هشک و بێ بەرهەمە د ناڤا هزراواندا، زێدەباری ماندیبوونا دەروونی و دەهـ سالێن نەداریێ وان ژی چاڤ ل میدیا جڤاکی کرییە و خویندن و نڤیسین و بزاڤێن چاپکرنێ بەرەڤ ئاقارێن تاری چووینە.
 
گازندە هەنە لسەر کەسێن هێلا پێشین یێن ڕێڤەبەریا بزاڤا چاپەمەنیا دهۆکێ و گەلەک ژ وان ب ساڵانە خۆ تڵوتڵ بسەر لەشێ سازیەکێ دا دڕێژکریە و وەک ملکێ بابینیێ لێدنێریت، لێ ب تنێ ئەڤە نینە، د ڕۆژا ئەڤرۆ دا هەفت زانینگەهـ ل ڤی باژێری هەنە و ب هەر هەفتان، چار کارێن باش ژێناهێن دیتن و ئەو ژی یێن بووینە دیکەفتیێن میدیا جڤاکی و مالپەرێن وان یێن لسەر تۆرا جیهانی نەماینە و نڤیسەر ب کێمی دشێن بابەتێن وان بدەستخۆڤە بینن.

لەوما دبێژم: د ڕۆژا ئەڤرۆ دا کو ژ مێژە دڤێت ئەڤ چەندە هاتباکرن، گرنکی ب چاپەمەنیێ بهێتەدان و گۆڤار بهێنە ژئێک ڤاڤارتن و هەر ئێک لایەکێ ئەکادمی بگریت و دەستێ سنێلە و گەنجا بهێتەگرتن و ڕاکێشان بۆ ناڤا ڤێ جیهانێ، دا ئەڤ خەباتا سەد سالیا کوردی و ب سەدان سالە یا مرۆڤاتیێ هەر یا بەردەوام بیت، و دڤێت بۆدجەیەکێ تایبەت بۆ دهۆکێ بهێتە تەرخانکرن بۆچاپکرنا پڕتووکێن نڤیسەران و د سەری دا یێن گەنجان، دڤێت وەرارا هزری لسەر دەستێ کەسێن شارەزا د جڤاکی دا بهێتە دەستپێکرن و ژ نهۆ پاش لاپەر ب تەنێ بۆ ڕەشکرنێ نەبیت بەلکۆ بۆ ئاڤاکرنێ بیت.