گاڤ

ل ژمارەکا گوندان ل ئێک ژ ویلایەتێن هندستانێ، دزین ژ دەولەمەندان پیشەیە و قوتابخانەیێن فێرکرنا وی کاری هەنە.

ل گۆرەی کەنالێ ئێن دی تی ڤی، ل گوندێن کادیا، جولخیدی و هولخیدی ل ویلایەتا پرادیش ل ناڤەڕاستا هندستانێ، دایک و بابێن هندەک زارۆکێن ژییێن وان د ناڤبەرا 12 بۆ 13 سالییێ دا، ب تایبەت ئەو زارۆکێن نەشێن خواندنێ تەمام بکەن و رێژەیا ژیرییا وان یا کێم، زارۆکێن خۆ دهنێرنە قوتابخانەیێن فێرکرنا دزییان.

ل وێ ویلایەتا هندستانێ، گرۆپەکێ مافیایێن ناڤخۆ هەیە و پرۆسەیا فێرکرنا زارۆکان ب ڤی رەنگی یە:

ل دەستپێکێ پێدڤییە سەمیانێن زارۆکی کۆژمەکێ پارەی کو د ناڤبەرا 200 بۆ 300 هزار رۆبییان (2400 بۆ 3600) دۆلاران دایە، بدەنە وی گرۆپێ مافیا.

پشتی مافیا زارۆکی وەردگرن، فێر دکەن کا چاوا بشێن بەریکان ب شەلینن، چانتەیان برەڤینن، خۆ ل پۆلیسان بەرزە بکەن، خۆ ل بەر قوتانێ و دربێن دژوار بگرن، قومارێ بکەن و مەیێ ڤەخۆن و بکڕن و بفرۆشن.

دەما فێرکرنێ سالەکێ و پشتی وێ سالێ ئەو گرۆپێ مافیا وان زارۆکان فێر دکەت کا چاوا بشێن ل قوتابخانە و جهێن گشتی تێکەلی دەولەمەندان ببن و ببنە هەڤالێن وان یێن نێزیک داکو بۆ ئاهەنگێن تایبەت یێن دەولەمەندان بهێنە داخوازکرن، ژبەر کو ب دیتنا وان، د ئاهەنگێن دەولەمەندان دا باشترین دەلیڤەیا دزینا تشتێن ب قیمەت هەیە.

ل گۆرەی پۆلیسێن هندستانێ، تا نوکە ل ناڤەڕاستا هندستانێ پتری 300 زارۆکان ب دزینا کەلوپەلێن گرانبها ژ ئاهەنگێن پێکئینانا هەڤژینییێ دتومەتبارن.