گاڤ

دەرهێنەرێ وی فلمێ کێشە خستینە د ناڤبەرا هندستان و ئەرەبستانا سعوودییێ دا دبێژیت: ئەو دێ فلمەکێ دی دەربارەی ژیانا ژنێن هندی ل سعوودییێ بەرهەم ئینیت.

فلمێ "ژیانا بزنێ The Goat Life" فلمەکە ئەڤ سالە ژ ئالییێ بۆلیوودێ ڤە هاتبوو بەرهەمئینان. ناڤەرۆکا فلمی گرێدای ژیانا دو وەلاتییێن هندستانێ یە کو بۆ مەرەما کاری دچنە ئەرەبستانا سعوودییێ، لێ هەر ل فرۆکخانێ ژ ئالییێ وەلاتییەکێ سعوودی ڤە دهێنە رەڤاندن و هەر ئێکی ژ وان دبەتە دەڤەرەکا بیابانێ، پاسپۆرتێن وان ژێ وەردگریت و وەک بەندە کاری ب وان ددەتە کرن.

ل گەل بەلاڤبوونا ڤی فلمی، ژمارەیەکا ئێکجار مەزن یا بینەران فلمی هەبوو و هەر زوی ئەرەبستانا سعوودییێ نەرازیبوونا خۆ ژ ناڤەرۆکا وی فلمی دیارکر و راگەهاند: چ راستی بۆ بابەتێن ب وی رەنگی نینە.

دێسی، دەرهێنەرێ فلمێ "ژیانا بزنێ" یە، ئەو دەربارەی فلمی دبێژیت: ئەرەبستانا سعوودییێ نەبتنێ وێ سەرەدەرییێ ل گەل کرێکارێن زەلام یێن هندی دکەت، بەلکو ژنان ژی وەک بەندە بکار دئینیت. لەورا ئەو دێ فلمەکی دی دەربارەی ژیانا وان ژنان بەرهەم ئینیت یێن ب مەرەما کاری ژ هندستانێ دچنە ئەرەبستانا سعوودییێ، لێ ژ ئالییێ شێخێن عەرەبان ڤە دهێنە برن، پاسپۆرتێن وان ژێ دهێنە وەرگرتن و وەک بەندە ل کۆچک و مەزرەعە و ڤێلایێن سعوودییێ کار ب وان دکەن.

د فلمێ "ژیانا بزنێ" دا، دو وەلاتییێن موسلمان ب ناڤێن نەجیب مەحموود و حەکیم ب مەرەما کاری ژ هندستانێ دچنە ئەرەبستانا سعوودییێ. ل فرۆکخانەیەکا سعوودییێ ژبەر کو ئەو زمانی نزانن، بەرزە دبن. ل وی دەمی کەسەک دهێت و دبێژیتێ ل گەل من وەرن. د فلمی دا سەرەدەرییەکا گەلەک نەمرۆڤایەتی ل گەل وان کرێکاران دکەت و وەک بەندە و ل هندەک جهان وەک گیانەوەر سەرەدەرییێ ل گەل وان دکەت، لەورا پشتی بەلاڤبوونا فلمی، ئەرەبستانا سعوودییێ کارڤەدان هەبوون.