گاڤ

فراكسیۆنێن كوردستانى د خوازن پڕۆژه‌ یاسایا ڤه‌گه‌ڕاندنا ملك و مالى بۆ خودانێن وان ده‌رباز ببیت و ئالیێن سیاسى چ كێشه‌یان بۆ دروست نه‌كه‌ن.

د راگه‌هاندنه‌كێ دا فراكسیۆنێن كوردستانى د خوازن پڕۆژه‌یاسایا ڤه‌گه‌ڕاندنا ملك و مالى بۆ خودانێن وان ل جڤاتا نوونه‌رێن ئیراقێ بهێته‌ ده‌ربازكرن و ده‌نگ ل سه‌ر بهێته‌ دان و داخواز ژ فراكسیۆنێن په‌ڕله‌مان و هه‌ڤپشكێن خۆ كریه‌ ل گه‌ل وان بن.

فراكسیۆنێن كوردستانى دیاركرینه‌، ده‌ربازكرنا پڕۆژه‌یاسایێ ژبۆ وێ بجهئینانا دادپه‌روه‌رى و دوماهى ئینانه‌ ب زیانڤێكه‌فتنا وان وه‌لاتیێن قوربانى ژ سیاسه‌تا رژێما ژ ناڤچوویى.

ده‌قێ راگه‌هاندنێ

ئه‌م فراكسیۆنێن كوردستانى ل جڤاتا نوونه‌رێن ئیراقێ، بێزارى و ره‌خنه‌یێن توند ده‌ردبڕین، ژ هه‌لوه‌ستێ هنده‌ك ژ فراكسیۆن و هێزێن سیاسى ل ناڤا جڤاتێ، كو جهێ داخێ یه‌ ب ئه‌نقه‌ست رێگریێ دكه‌ن ژ ده‌ربازركرن و په‌سه‌ندكرنا پڕۆژه‌یاسایا ڤه‌گه‌ڕاندنا ملك و مالى بۆ خودانێن وان كو هنده‌ك ژ بڕیارێن جڤاتا سه‌ركردایه‌تییا شۆڕشا هه‌لوه‌شیایى ڤه‌دگریت، كو رێزبه‌ندكرینه‌ د نه‌خشه‌یێ كارێن روونشتنا كارێ په‌ڕله‌مانى دا، ئه‌و یاسایه‌ د حاله‌تێ ده‌نگدان ل سه‌ر ماف بۆ وان كه‌سان ڤه‌دگه‌ڕیت یێن مفاداربووین و زیان ب ده‌ستێ سیاسه‌تا سه‌ركوتكارى یا سه‌ر ده‌مێ دكتاتۆریه‌تێ دا، پڕۆژه‌ یاسا چه‌ندین ناوچه‌یێن ئیراقێ ڤه‌دگریت و نه‌دادیێ ل سه‌ر سته‌ملێكرییان لادبه‌ت و مولكێن وان بۆ ڤه‌دگه‌ڕیت كو ل سه‌رده‌مێ به‌عسا گۆڕبگۆڕ دا ده‌ست ب سه‌ردا گرتى.

ژبه‌ر ڤێ یه‌كێ داخوازێ ژ فراكسیۆنێن په‌ڕله‌مانى و هه‌ڤپشكێن خۆ دكه‌ین ل گه‌ل مه‌ بن بۆ ده‌ربازكرنا ڤى پڕۆژه‌یاسایێ ژبۆ وێ بجهئینانا دادپه‌روه‌رى و دوماهى ئینان ب زیانڤێكه‌فتنا وان وه‌لاتیێن قوربانى سیاسه‌تا رژێما ژ ناڤچوویى بووین ژبۆ زامنكرنا سه‌قامگێرى و ئاشتى و كۆمه‌لایه‌تیێ ل ناوچه‌یێن كێشه‌ ل سه‌ر.

فراكسیۆنێن كوردستانی

• فراکسیۆنا پارتی دیموکراتى کوردستان 
• فراکسیۆنا ئێكه‌تییا نیشتمانیی یا کوردستانێ 
• فراکسیۆنا نەوەی نوێ 
• فراکسیۆنا یەکگرتوویا ئیسلامیی یا کوردستانێ 
• فراکسیۆنا کۆمەلا دادگەری یا کوردستانێ 
• پەرلەمانتار فارۆق حه‌نا عه‌تو/  پێکهاته‌یا مەسیحی