گاڤ

ئەڤرۆ بەرێ بنیاتی بۆ کۆمەلگەها ئاکنجیبوونێ یا گوندێ کۆچۆ هاتە دانان و سەرۆکوەزیرێ ئیراقێ سۆزا بجهئینانا ژمارەکا دی یا پرۆژەیان ل سنۆرێ دەڤەردارییا شنگالێ دا.

ئەڤرۆ ل کۆمەلگەها کۆچۆ بەرێ بنیاتی بۆ کۆمەلگەها ئاکنجیبوونێ یا کۆچۆ هاتە دانان، ئەو کۆمەلگەهە دێ ل سەر 65 دۆنەمێن ئەردی بیت و 134 یەکەیێن ئاکنجیبوونێ دێ تێدابن.

محەمەد شیاع سوودانی، سەرۆکوەزیرێ ئیراقێ ب رەنگەکێ ئۆنلاین پشکداری رێورەسمێن دانانا بەرێ بنیاتی بوو و راگەهاند: ژبلی کۆمەلگەها کۆچۆ، دێ نەخۆشخانەیەکا 100 تەختی ل سەنتەرێ شنگالێ هێتە ئاڤاکرن، نەخۆشخانەیەکا دی ژی ل سنوونێ و هەروەسا دێ پرۆژەیێ ئاڤێ ل رەبیعە ژی کەڤیتە کاری.