گاڤ

ب هەلکەفتنا جەژنا جەمایێ یا ئێزدیان بارەگایێ بارزانی پەیامەک بەلاڤکر و تێدا سەرۆک بارزانی جەژنا جەمایێ ل میرێ ئێزدیان، بابا شێخ، جڤاتا رۆحانی و تەڤایا ئێزدیێن کوردستانێ و جیهانێ پیرۆز دکەت.

د پەیامێ دا هاتیە؛ برین و ئازارێن خویشك و برایێن ئێزدی، برین و ئازارا هەمی كوردستانیانە و د خەم و خۆشیاندا هەڤپشكین. پێدڤی یە هەمی ئەو ئاستەنگ و ئەگەرە نەمینن كو رێگرن ل بەر ئاسایبوونا ژیانا ئێزدییان و ب تایبەت ل دەڤەرا شنگالێ.

سەرۆک بارزانی زێدەتر گۆتیە؛ هەر ب ڤێ هەلكەفتێ تەكەزێ ل بهێزكرنا فەرهەنگا پێكڤەژیانێ ل كوردستانێ دكەم و هیڤیدارم خویشك و برایێن مە یێن ئێزدی جەژن و هەلكەفتێن خۆ ب ئارامی و دلخۆشی بگێرن.

جەژنا جەمایێ ئێکە ژ کەڤنترین جەژنێن ئێزدیان و رێورەسمێن وێ ژ رۆژا 7ێ هەتا 13ی چریا ئێکێ دهێنەکرن و ئێزدی ژ هەمی دەڤەران قەستا پەرستگەها لالەش دکەن.