سەرۆک نێچیرڤان بارزانی: پێدڤیە پێشمەرگە هێزەکا نشتیمانی بیت

بەلاڤ بکە

 

 

 

 گاڤ

سەرۆک نێچیرڤان بارزانی ئەڤرۆ ئێڤاری د رێورەسمەکێ دا کو بۆ دەستبکاربوونا هەر دو فرقەیێن سێ و چار یێن پیادە یێن وەزارەتا کاروبارێن پێشمەرگە یا کوردستانێ ل سەرۆکاتییا هەرێمێ ب رێڤەچوو، گۆتارەک پێشکێش کر.

د رێورەسمی دا جه‌نەرال كیڤن لیهی، فەرماندارێ گشتییێ هێزێن هەڤپەیمانییا نێڤدەولەتی ل ئیراق و سووریێ، شێخ جەعفەر شێخ مستەفا جێگرێ سەرۆکی، وەزیرێ کاروبارێن پێشمەرگە، وەزیرێ ناڤخۆ، سوپاسالارێ پێشمەرگەی و ژمارەیەکا بەرپرسێن بلند یێن هەرێما کوردستانێ نوونەرێن وەلاتێن بیانی د ئامادەبوون.

سەرۆک نێچیرڤان بارزانی د گۆتارەکێ دا بەحس ل گرنگییا گاڤا پرۆسەیا ئێکخستنا پێشمەرگەی کر کو ئەڤە دەقێ گۆتارا وی یە:

هەمی ئالی گەلەک ب خێر بهێن بۆ رێورەسمێن دەستبکاربوونا هەردو فرقەیێن سێ و چار یێن پیادە یێن وەزارەتا کاروبارێن پێشمەرگە، پشتی کو ل ئۆکتۆبەرا بۆری مە فەرمانا هەرێمی بۆ دامەزراندانا ئەوان دو فرقەیان دەرکری، گەلەک دلخۆشین کو ئەڤرۆ وەک پشکەک و گاڤەکا دی یا پرۆسەیا چاکسازی و ئێکخستنا پێشمەرگەی لنم چەترێ وەزارەتا کاروبارێن پێشمەرگە یا حکومەتا هەرێما کوردستانێ دێ دەستبکاربن.

 پێشمەرگە ب تەنێ هێزەکا سەربازی یا ئاسایی نینە، بەلکو هەردەم هێمایێ قارەمانی و فیداکاری و پارێزەرییا ئاسایشا کوردستانێ و پشکەکا گرنگ یا ناسنامەیا نشتیمانی بوویە، هەر د ئێکەم رۆژا دروستبوونا وێ هێزا شورەش پارێزەرا گەلێ کوردستانێ بوو، ل دەما رێکخستنا تیرۆرستییا داعشێ وەک گەفەکا جیهانی دەرکەفتی پێشمەرگە ل رێزا پێشیێ یا وان هێزان بوو ئەوێن رووبرووبووی وێ ترس و گەفان بووین.

پێشمەرگەی، ب قارەمانانە شەرەکێ گران ل پال هەڤپەیمانیا نێڤدەولەتی یا دژی داعشێ کر و بۆ جیهانێ سەلماند کو تەنێ هێزەک نینە بۆ بەرگریێ ژ کوردستانێ و بۆ پاراستنا پێکڤەژیانا ئاشتیانە یا هەمی پێکهاتەیێن کوردستانێ، بەلکو قەلغانەکە بۆ پاراستنا مرۆڤایەتییێ ل ڤان گەفێن هەڤپشک، ژبەر هندێ ئەو شانازییە پێ هاتە کرن کو بەرگریێ ل هەمی مرۆڤایەتیێ بکەت ل جیهانێ و ژ پێخەمەت وێ ژی دا ب گیان و خوینێ بجەنگیت، ل دویماهیێ ژی دا سەرکەفتن و ل بن فەرماندارییا سەرۆک مەسعوود بارزانی، ئەفسانەیا داعشێ تێکشکاند.

 ژبەر قارەمانی و سەرکەفتنێن وان یێن مەزن، پێشمەرگە ل ئاستێ جیهانێ دا بۆ سیمبۆلا ئازایەتی و جهێ شانازیا گەلێ کوردستانێ، ل ناڤا هەمی گەل و وەلاتێن جیهانێ ناڤێ پێشمەرگەیی وەک جەنگاوەرەکێ قەهرەمان ژ پێخەمەت پاراستنا مرۆڤاتیێ دا دەرکەفت.

ئەڤ دەستکەفتێن ئەڤرۆ ب دەستڤە نەدهاتن، ئەگەر پشتەڤانییا هەڤپشکێن مە ل هەڤپەیمانییا نێڤدەولەتی نەبوون کو ب رەنگەکێ کارا پشکداربوون ل بزاڤ و گاڤێن رێکخستنا پێشمەرگەی، چ برێکا مەشق و راهێنانان، یان ژی دابینکرنا پێدڤیاتیێن سەربازی، یان پشتەڤانیین لۆجستی.

ئەم ل هەرێما کورستانێ سوپاسی و پێزانینێن خۆ یێن کویر دوپات دکەین ژبۆ وی رۆلێ کو دوستێن مە ل هەڤپەیمانیا نێڤدەولەتی ب سەرکردایەتییا ئەمریکا بۆ پشتەڤانیکرنا مە ل ئیراقێ و هەرێما کوردستانێ د دژوارترین دەم دا، گێرایی.

هەروەسا بۆ هاریکاریکرنێ ل پرۆسەیا چاکسازی و ئێکخستنا و رێکخستنا پێشمەرگەیی، دۆستێن مە ل هەڤپەیمانیا نێڤدەولەتی ب تایبەتی و ل رێزا ئێکێ ئەمریکا، پاشی وەلاتێن دی وەک، بریتانیا، ئه‌لمانيا،هۆله‌ندا،هنگاريا،ئيتاليا و ف‌ره‌نسا، پشکداری ل دانانا بنەمایێن پێدڤی بۆ ئێکخستنا پێشمەرگەی لبن سیبەرا وەزارەتا کاروبارێن پێشمەرگە یا حکومەتا هەرێما کوردستانێ کریە کو پێشمەرگەی بەرهەڤ دکەت ژ بۆ کو ببنە هێزەکا پیشەیی یا شەفاف، هێزەک ب دلسۆزی خزمەتا گەلێ کوردستانی ب هەمی پێکهاتەیێن خۆڤە دکەت و پشکەکا کارا و کارتێکەر دبیت ل سیستەمی بەرگرییا ئیراقێ.

پێکئینانا فرقەیێن سێ و چار یێن پیادە یێن پێشمەرگە، ئەڤرۆ گاڤەکا گرنگ و ستراتیژییە بەرەڤ ب دەستڤەئینانا ئارمانجێن مە ێین مەزنتر کو پێکهاتینە ژ دروستکرنا هێزەکا نشتیمانی یا ئێکگرتی، هێزەک کو پیشەیی و رێکخستی تر بیت و ل بەرانبەر هەر گەفەک و مەترسیەکێ شیانێن پاراستن و بەرگریکرنێ ژ وەلاتی هەبن.

ئەڤ هێزە ل بن چەترێ وەزارەتا کاروبارێن پێسمەرگەی دا کار دکەن و پشتراستیێ ژ وێ یەکێ دکەن کو هێزێن مە هەر گاڤ د ئامادەباشییەکا تەمام دا بن بۆ رووبرووبوونا هەر گەفەکێ لسەر ئاسایشا هەرێما کوردستانی و پاراستنا ئارامی و سەقامگرییێ.

راستە پشتەڤانیا دۆستێن مە گەلەک یا پێدڤی و گرنگە، لێ ئەم باش دزانین کو ل دویماهیێ سەرکەفتنا دروست یا ڤێ پرۆسێ، دێ پشتا خۆ ب ئیرادەیا ناڤخۆ گەرم کەین، ئێکخستنا هێزێن پێشمەرگەیی پێدڤی ب کارکرنا هەمی ئالیانە ب روحەکا ئێکتیمی و زالبوون ب سەر هەر جودابوونەکێ و ناکۆکیەکێ کو دبیت رێگربیت ل هەمبەر ڤی پرۆژەیێ نشتیمانی. پێشمەرگە پێدڤیە هێزەکا نشتیمانی دویر ژ سیاسەتێ و دەستوەردانا حزبی بیت، هێزەک بیت بتنێ بۆ پارستنا کوردستانێ بیت.

بۆ ڤێ مەرەمێ داخوازیێ ژ پارتی و ئێکەتیێ دکەم، د هاریکاربن بۆ سەرخستنا پرۆسەیا چاکسازیێ و ئێکخستنا پێشمەرگەیی، سەرخستنا ڤێ پرۆسێ ئەرکەکێ نشتیمانی و نەتەوەیی یێ هەمیانە و پێدڤیە هەر چ کێشە و ئاستەنگی هەبیت، بهێنە چارەسەرکرن، تاکو ل دویماهیێ هەمی پێشمەرگە وەک هێزەکا نشتیمانی یا کوردستانێ ل بن چەترا وەزارەتا پێشمەرگەیی کۆمببن ب ئێک سەرکرداتی، ئێک کونترۆل و ئێک ناڤەندا راستەکرنێ هەبیت.

زێدەباری وێ یەکێ کو پرۆسەیا چاکسازی و ئێکخستنا پێشمەرگەیی ل گۆرەی خواست و چاڤەرێبوونا مە نینە، لێ کار و بزاڤێن مە بۆ سەرخستنا ڤێ پرۆسێ ل ڤێرێ ناراوەستن.

ئەڤە پرۆسەیەکا نشتیمانی یە، سۆزا مەیە ل هەمبەر گەلێ کوردستان و خوینا شەهیدان و نفشێن داهاتی، ژبەر ڤێ یەکێ ب هەمی وزە و شیان و ئیرادە دێ د بەردەوامبین ل سەر کارکرنێ بۆ سەرخستنا پرۆسێ و داکو هێزێن پێشمەرگە هەردەم نیشانا ئێکرێزێ و هێز و قەلغانەک بیت بۆ پاراستنا کوردستانێ ل هەمبەر هەمی گەف و مەترسیان.

هەر د ڤێ بوونێ دا هاریکاری و هەماهەنگیا پێشمەرگەیی ل گەل هێزێن سوپایێ ئیراقێ گەلەک یا پێدڤی یە و گەلەک ب گرنگی د هەلسەنگینین، داخوازێ ژ حکومەتا ئیراقێ دکەین ل گۆرەی دەستووری و یاسایێ سەرەدەریێ ل گەل پێشمەرگەیی بکەن وەک پشکەک ژ سیستەمێ بەرگریا ئیراقێ و ژ هەمی روویەکێ ڤە ئەرک و پابەندیێن خۆ بەرانبەر ب پێشمەرگەیی بجهبینیت.

قارەمانی و قوربانیێن پێشمەرگەیی و خوینا شەهیدێن نەمر یێن کوردستانێ، ل گەل پشتەڤانیا هەڤپشكێن مە ل هەڤپەیمانیا نێڤدەولەتی و پابەندیێن هەڤپشکێن مە، دبنە ئەگەر ل ڤێرێ ب شانازی و سەربلندی ڤە ل سەر کاروانێ خزمەت و پێشخستنا کوردستانێ بەردەوامبین و چ جاران کول نادەین د بزاڤێن ئێکخستنا پێشمەرگەیی دا.

پشتراستم دەستبکاربوونا هەردو فرقەیێن سێ و چار و بەردەوامی و بەرەڤپێشچوونا پرۆسەیا  ئێکخستنا پێشمەرگەیی، سەرباری هەمی بەربەست و کێشەیان، جهێ خۆشحالیێ یە و گیانێ شەهیدان شاد دکەت.

هەروەسا د دەمەکی دا دەڤەر د رەوشەکا ئالۆز دا دەربازدبیت و رویبروی چەندین ئالنگاریان دبین، گەلێ کوردستانێ گەلەک ب ئۆمێد ڤە چاڤەرێ نووچەیێ پێکئینانا کابینەیا نوی یا حکومەتێ دکەت.

ژبەر ڤێ یەکێ داخوازێ ژ ئالیێن سەرکەفتی یێن هەلبژارتنان دکەم ئەڤێ بکەنە ئەولەویەتا خۆ یا ئێکێ ب سەرکەفتنا دانوستاندنان و رێککەفتن و پێکئینانا حکومەتا نوی دلێ گەلێ کوردستانێ ب هەمی پێکهاتەیان ڤە خۆش بکەن، ب زویترین دەم حکومەتەک بهێتە پێکئینان کو بەرسڤا داخوازیێن وەلاتیان بدەت.

 

 

More About