گاڤ

سەرۆک بارزانی کۆمەکا پەیامان ل دۆر رەوشا کوردان ل هەرچار پارچەیێن کوردستانێ و دەڤەرێ و جیهانێ راگەهاندن.

ئەڤرۆ رۆژا پێنجشەمبی، 08-05-2025، سەرۆک مەسعوود بارزانی، د چارچووڤەیێ چاڤپێکەفتنەکا ل گەل کەنالێ شەمس دا هژمارەکا پەیامان راگەهاندن و بەحسی رەوشا هەرێما کوردستانێ و پارچەیێن دی یێن و کوردستانێ و دانوستاندنێن ئەمریکا و ئیرانێ و رەوشا سووریا و دەڤەرێ کر.

سەرۆک بارزانی بەحسی کاریگەرییا بارزانییێ نەمر ل سەر خۆ کر و گۆت: بابێ من کاریگەریەکا مەزن ل سەر من هەبوو، دەما چوویە ئێکەتییا سۆڤیەتێ ئەز یێ شەش هەیڤی بووم. دەما هاتییەڤە ئەز 12 سال بووم لێ من دزانی بۆ دۆزا کوردی چوویە سۆڤیەتێ و دەمێ ئەز مەزنبوویم من هەست ب بەرپرسیارەتییێ کر.

سەرۆک بارزانی بەحسی رەوشا کوردستانێ کر و گۆت: بێ گۆمان ئێش و ئازارێن مەزن ب سەرێ گەلێ مە و کوردستانێ هاتینە. د خەباتا دێرین دا گەلێ مە تویشی چەند کارەساتێن وەکی ئەنفال و کیمیبارانێ بوویە. لێ چ جاران هیڤییێن خۆ ژ دەستنەدان و ب هیڤی بوون کو بگەهنە ئارمانجێن خۆ و خۆ فیدا کر. رەوشا نوکە بەرهەمێ خوینا گەنجێن مە و خەباتا گەلێ مە یە. ئەم شانازییێ ب ڤێ رەوشێ دبەین و کەسێ چ منەت ل مە نەکریە.

ئەم ژی نەتەوەیەکین کو ل ڤێ دەڤەرێ دژین و ژ کەڤن دا و بەری گەلەک ژ ڤان نەتەوەیان ل ڤێرێ بووین و ب درێژاهییا دیرۆکێ  ل ڤێرێ دژیایین و ب غەدرەکا مەزن ڤە بێی پرسا مە هاتیینە دابەشکرن. بۆ جارا ئێکێ ل پەیماننامەیا سیڤەرێ هەڤپەیمانان مافێ چارەنڤیسی دا مە، لێ پاشی پەشیمان بوون و ڤێ چەندێ کەتوارەکێ تەعل ب دویڤ خۆ را ئینا کو یێ ب ساناهی نینە.

سەرۆکی د درێژاهییا گۆتنا خۆ دا گۆت: ئەم گەلەکین غەدرەکا مەزن ل مە هاتییە کرن، لێ ئاشتیخوازین و ناخوازین ڤی کەتەواری ب زۆری بگوهۆرین. مە دڤێت ب رەنگەکێ ئاشتیانە د چارچووڤەیێ ڤان وەلاتان دا بژین، لێ نابیت بۆ هەتاهەتایێ ژ مافێن خۆ بهێینە بێ-بەهر کرن.

سەرۆکی بەحسی رەوشا سووریێ ژی کر و دیار کر؛ بێ-گومان ئەو گوهۆرینێن ل سووریێ رویداین د چاڤەرێکری بوون لێ نە ب ڤی راددەیی. ئەم پاشخانەیا دەستهەلاتا نوی یا سووریێ دزانین لێ پشتی هاتینە سەر دەستهەلاتێ پەیاما ئاشتییێ بۆ مە هنارت، مە پەیوندییێن راستەوخۆ ل گەل نینن لێ پەیوەندییێن نەراستەوخۆ هەنە. وان گۆت؛ مە ئاشتی و سەقامگیری دڤێت و مە دڤێت ل گەل کوردان بگەهینە رێککەفتنێ. مە ژی بزاڤێن خۆ ل گەل کوردێن رۆژئاڤایێ کوردستانێ کرن بۆ هندێ ئێک هەلویست بن. کوردان کۆنفرانسێ خۆ یێ ئێکهەلویستییێ کر و بریاردا ئێکگرتی بچنە دیمەشقێ، ئەم ژی پشتەڤانییێ ل ڤێ چەندێ دکەین.

سەرۆک بارزانی بەحسی رەوشا ئیرانێ و دانوستاندنێن ئەمریکا و ئیرانێ کر و راگەهاند؛ ئەز ل مهابادێ ژ دایکبوویمە و ئیران ل دەڤەرێ دەولەتەکا گرنگە. ئەم حەز ناکەین مە کێشە ل گەل هەبن، لێ حەز ناکەین مایتكێرنێ ژی د کاروبارێن ناڤخۆیی یێن مە دا بکەت.

سەرۆکی هەروەسان گۆت: هندەک جاران د پەیوەندییێن مە یێن ل گەل ئیرانێ دا، گرفت دروستبووینە لێ  نوکە دباشن. مە نەڤێت ببینە پشکەک ژ ناکۆکییێن وێ ل گەل ئالییێن دی. ب راستی وەک بنەمایەک، یا باشە کێشە ب رێکا دانوستاندنێ بهێنە چارەکەن نەک ب رێکا شەری، ئەم دخوازین ئەڤ دانوستاندنە بگەهنە ئارمانجێ لێ بلا رێککەفتنەک ل سەر حسابا خەلکێ دی نەهێتەکرن. ئەم ل گەل هندێینە کو ب رێکا دانوستاندنێ كێشەیێن ئەتۆمی و یێن دی ژی بهێنە چارەکرن و بلا رێککەفتنەک نەهێتەکرن کو کڕین و فرۆتنا خەلکەکێ دی تێدا بیت.

سەرۆک بارزانی ل دۆر رۆلێ ئەمریکا د دروستکرنا قەوارەیێ هەرێما کوردستانێ دا گۆت: ئەگەر ئەمریکا نەبا، ل سالا 1991ێ مە نەدشیا ئەوا هەیی دروست بکەین وێ و هەڤپەیمانێن دی هاری مە کر و د شەرێ دژی داعشێ ژی رۆلێ وێ کاریگەر بوو. پەیوەندیێن مە ل گەل ئەمریکا د باشن و هندەک جاران تووشێ گرفتان بووینە لێ مە دڤێت ئەڤ پەیوەدندییە باشتر ببن.

سەرۆکی ل دۆر سەرۆکێ ئەمریکا دیار کر؛ هەتا نوکە من ترەمپ نەدیتیە. لێ رەفتارا وی جودایە ژ سەرۆکێ دی یێن ئەمریکا. سەرکەفتنێ بۆ دخوازین هندەک تشتێن وی ب دلێ منن هندەک بریار دان ئەز پشتەڤانییێ ل وان بریاران دکەم. ئەوا کو ب ئەمریکا دهێتە کرن ل سەرانسەری جیهانێ ب کەسێ ناهێتەکرن ، ئەگەر ئەمریکا نەشێت چارەسەریەکا ئاشتیانە بۆ رەوشا دەڤەرێ ڤەببینیت، کەس نەشێت.

سەرۆکی هەروەسا گۆت ژی: خەلکێ کوردستانێ خودانێ فەرهەنگەکا دەلەمەندە و ب درێژاهییا دیرۆکێ گرفتێن ئایینی نەبووینە. ئەڤە گەلەک هاریکاربوویە کو ژ گرفتێن مەزن دەربازببین. ل سالێن 80یان ئەنفال و کیمیابارنکرن و چ نەما بەرانبەری مە نەهێتەکرن، 180 هزار کەس شەهیدیبوون لێ پشتی سەرهەلدانێ کوردان تۆلڤەکرن نەکر. شەر ژ هەمی تشتان خرابترە لێ ژ شەری خرابتر تەسلیمبوونە بۆ زۆرداران.

سەرۆکی هەروەسا گۆت: دڤێت مرۆڤی وەلاتێ خۆ بڤێت و خەلکێ مە سەلماندییە کو حەز ژ وەلاتێ خۆ دکەت و ژ کەرتێ تایبەت و گشتی، هەمییان بزاڤکریە وەلاتێ خۆ ئاڤا بکەن. دەمێ پشتی ئەنفالان دچوومە گوندان من دگۆت؛ چ جاران نەشێین ڤی وەلاتی ئاڤا بکەین، لێ دەما نوکە دچم دبێژم؛ چەوا ئەڤ چەندە هاتە کرن. مە وەلاتەکێ دەولەمەند هەیە، لێ مە دەرفەت نەبوویە مفایی ژ ڤێ دەولەمەندییێ ببینین. ئیراق ل سەر نەفتا کەرکووکێ کو یا کوردستانێ یە ئاڤابوویە، و بوویە دەولەت، ئیراق ل سەر نەفتا کەرکووکێ کو کوردستانە بوو دەولەت، لێ مە خێر ژ وێ نەفتێ نەدیت، ئیراقێ هەمی دا ب بۆمبە و ل مە باراندن. پشتی هەرفینا رژێمێ دەرفەتەکا زێرین بۆ هەمی ئیراقییان هاتە پێش و مە ل سالا 2005ێ دەستوور نڤیسی. لێ پێگری پێ ناهێتەکرن.

ئەو ژی دیار کر: ئەڤ پێشکەفتنا هەرێما کوردستانێ بێی کێشە نەبوو، ئیراقێ بودجە بری، شەرێ داعشێ ل سەر مە هاتە سەپاندن و کۆرۆنا هات ئەڤە هەمی بوونە ئاگەر کو پێشکەفتن براوەستیت. لێ ئەڤ پێشکەفتنە بۆ هیممەتا خەلکێ مە ڤەدگەریت.

سەرۆکی بەحسی جۆرج دەبلیۆ بۆشی ژی کر و گۆت: سەرۆک بۆش جهێ رێزەکا مەزنە بۆ من و  هەمی گەلێ کورد، دۆستەکێ رێزدار و مەزنە.

سەرۆکی بەحسی مافێ چارەنڤیسی بۆ گەلێ کورد ژی کر و گۆت: کوردان مەجالێ وێ چەندێ نەبوو د بیاڤێن وەکی سیاسەت، بازرگانی یێن دی دا، کارێ مەزن بکەن، لەورا تەکەز کرە سەر کلتووری و کورد خودان کلتوورەکێ دەولەمەند و سەربخۆ نە. هەردەم باوەرییا من یا نەگوهۆرە و کوردان مافێ دیارکرنا چارەنڤیسێ خۆ هەیە، لێ نە ب زۆری. دخوازم وەکی هەمی نەتەوەیێن دی، مللەتێ کورد بگەهیتە ئازادی و سەربخۆییا خۆ، لێ چەند سالێن دی ئەڤ چەندە دێ رویدەت، ئەز نزانم.

سەرۆکی بەحسی خۆشترین رۆژێن ژیانا خۆ ژی کرن و گۆت: د ژیانا خۆ دا من تشتەک نەکریە کو ژێ پەشیمان ببم چونکی من هەمی تشت ب باورەری ڤە کرینە. لێ ئەگەر دەم ڤەبگەریت، گەلەک تشت هەنە ئەگەر وەکی نوکە من زانیبان دا ب رەنگەکێ دی رەفتارێ کەم، لێ خۆشترین قووناغ بۆ من سەرهلدان بوو بەری هنگی کو یێ زارۆک بووم بابێ من ل سالا 1958ـێ ژ سۆڤیەتێ ڤەگەریا و شیخ ئەحمەد ژ زیندانێ ئازادبوو و رێک هاتە دان کو ئەم ڤەگەرینە بارزان، ئەڤ رویدانە ژی د خۆش بوون، لێ ئەز یێ زارۆک بووم. لەوما خۆشترین رۆژێن ژیانا من، رۆژێن سەرهلدانێ بوون.