نورا جعفر شیمو

راگەهاندن بتنێ ئامرازەکێ گەهاندنا دەنگوباسان نینە بەلکو ئاوێنەیا جڤاکی یە،  پرسا « ئافرەت و راگەهاندن » د جڤاکێ مۆدێرن یێ کوردی دا بابەتەکێ فرە ڕەهەندە د لایەکی دا ئافرەتێ شیانێن خۆ چەسپاندنێ یێن هەین بەلێ  د لایێ دی دا ل سەر سۆشیال میدیایێ رووبەڕووی هێرش و دیتنەکا گەلەک کرێت دبیت  ل سەر دەستێ پشکەکا جڤاکی .

ئەگەر بپرسین بۆچی جڤاک ب ڤی شێوەی بەرێ خو ددەتە ئافرەتێ ل سەر سۆشیال میدیایێ و ئەگەر چنە؟

ئێک ژ ئەگەرێن هەرە سەرەکی ئەوە کو جڤاکێ مە ( تەڕ و هشکان پێکڤە دسوژیت )ئەڤە ئێک ژ مەزنترین ئار]شێن جڤاکێ مەیە ،  دەما کچەک یان ئافرەتەک ل سەر سۆشیال میدیایێ تشتەکێ نەشرعی رەفتارەکا نەجوان یان ناڤەڕۆکەکا بێ رامان و نزم پێشکێش  دکەت بتنێ ژ بۆ زێدەکرنا  لایک و بینەران ، جڤاک ب شێوازەکێ گشتی حوکمی ل سەر هەمی ئافرەتان دکەت ، ئەڤ رەفتارە ب رامانا وێ چەندێ یە کو دبێژن « ئەگەر ئێکی خرابی کر ، نەخۆش هەمی وەک ئێکن » ئەڤەژی دبیته ئەگەرێ وێ چەندێ کو ناڤێ کچ و ئافرەتێن خودان شیان بهێنە بەراورد کرن ل گەل ئافرەتێن رەفتار نە هةذى و ناڤێ وان بهێتە زڕاندن و مافێ وانا یێ دەربڕینێ بهێتە خوارن .

هەروەسا هێشتا پشکەکا هزرکرنا جڤاکی د بن کارتێکرنا تێگەهشتنێن کەڤن  دایه ، دەمێ ئافرەت دبیته خودان دەنگ و رەنگ ل سەر سۆشیال میدیایێ و ب ئازادی دئاخڤیت، هندەک ڤێ چەندێ وەک لادان ژ دابونەریتان دبینن و ب کۆمێنت و پەیڤێن نە جوان هێرشێ دکەنە سەر .

تەکنەلۆژیا و سۆشیال میدیا گەلەک بلەز هاتنە د ناڤ ژیانا مە دا،  بةل] کلتؤرێ دروست پێشڤەنەهات، مرۆڤ هێشتا فێر نەبووینە رێزێ ل ئازادییا تایبەتا کەسێ بەرامبەر بگرن، نەخاسمە ئەگەر کەسێ بەرامبەر ئافرەت بیت .

لەوما دبێژم بۆ راستکرنا ڤێ دیتنا نەرێنی ، پێدڤییا مە ب گۆهرینەکا  فەرهەنگی و پەروەردەیی هەیە ، دڤێت جڤاک فێر ببیت کو« خرابیا کەسەکێ ل سەر کەسەکا دی ناهێتە حسابکرن » ئافرەتا کورد خودان عەقل و هزرە  و پێدڤییە میدیا و سۆشیال میدیا ببنە جهێ رێزگرتنێ و پێشخستنا شیانێن وێ، نەک ببیتە گۆڕەپانا شکاندنا کەرامەت و کەسایەتییا وێ، رێزگرتن ل ئافرەتێ ل سەر جیهانا دیجیتالی، نیشانا پێشکفتنا شارستانی یا جڤاکی يە.