ده‌قێ گۆتارا سه‌رۆك نێچیرڤان بارزانى ل رۆژا سه‌روه‌رییا ئیراقێ ل بهغدایێ
بەلاڤ بکە
ده‌قێ گۆتارا سه‌رۆك نێچیرڤان بارزانى ل رۆژا سه‌روه‌رییا ئیراقێ ل بهغدایێ
رێزدار جه‌نابێ عەلی فالح ئەلزەیدی
سه‌رۆكوه‌زير و فه‌رمانده‌یێ گشتى يێ هێزێن چه‌كدار،
رێزدار سه‌رۆكێ جڤاتا نوێنه‌رێن ئیراقێ
به‌رهه‌ڤبویی و مێهڤانێن رێزدار،
سلاڤێن خۆدێ ل هه‌وه بن..
خۆشحالم ئه‌ڤرۆ ل ڤێ هه‌لكه‌ڤتا نیشتیمانی ل به‌غدا ل گه‌ل هه‌وه مە، د قویناعه‌كا ڤه‌گوهێز وه‌رچەرخانێ دا بۆ وهلاتێ مە كو هه‌ڤده‌مه دگه‌ل ب دویماهیهاتنا ئه‌ركێ هه‌ڤپه‌یمانییا نێڤده‌وله‌تی ل ئیراقێ.
بۆ چه‌ندین ده‌‌هه‌یان، ئیراق د قویناغێن گه‌له‌ك ب زه‌حمه‌ت و دژواردا دەرباز بوو. ده‌مێ تیرۆریستێن داعشێ هێرش كرییه سه‌ر وهلاتێ مە، هه‌مى ئیراقی پێكڤه د ئێك سه‌نگەردا ل دژى تیرۆرێ راوه‌‌ستییان.
سوپایێ ئیراقێ، پێشمه‌رگه، حه‌شدا شه‌عبی دگه‌ل سه‌رجه‌م هێزێن چه‌كدار و ئه‌منی، ب خوین و قوربانیدانا هه‌ڤپشك به‌رگری ژ ڤی وه‌لاتى كر. ل ڤێرێ، ب ڕێزه‌كا مه‌زنڤه ل قوربانیدانا هه‌مییان دنێڕین. سلاڤان بۆ گیانێ پاقژێ سه‌رجه‌م شه‌هیدان د هنێرین.
د وێ قویناغا دژوار دا، لسه‌ر داخوازا حكومه‌تا ئیراقێ، ئهمریكا د گه‌ل هه‌ڤپه‌یمانییا نێڤده‌وله‌تی و دۆستێن مە، ل ته‌نشت مە راوه‌ستیان و هه‌ڤكارییا مە كر. ئه‌م هه‌مى ئیراقی ڤێ ژ بیر ناکەین و رێزێن مە بۆ پشته‌ڤانییا وان هه‌نە.
ئه‌ڤرۆ ژی كو ل گۆره‌ى رێككه‌ڤتنا وان د گه‌ل حكومه‌تا فیدرال؛ ئاخا ئیراقێ ب جهـ دهێلن، ئه‌م چو جاران وێ هاریكارى و پشته‌ڤانییێ ژ بیر ناکەین و بۆ هه‌ر و هه‌ر ب رێزڤه لێ دنێڕین، لێ رێزگرتنا راسته‌قینه دڤێت ب هه‌لگرتنا به‌رپرسیارییا نیشتمانی ل ئیراقێ پێشڤه بچیت.
پیڤه‌رێ سه‌ركه‌ڤتنا پشته‌ڤانییا نێڤده‌وله‌تی ئه‌و نینه هه‌تا هه‌تایێ هێزێن بیانی ل ڤێرێ بمینن، به‌لكو ئه‌وه ئه‌مێن ئیراقی؛ ئه‌ڤرۆ ب تمامى؛ مه شیان هه‌بن به‌رپرسیارییا پاراستنا ئاسایش و سه‌قامگیرییا وهلاتێ خۆ بێخینه سه‌ر ملێن خۆ.
ب دویماهیهاتنا ئه‌ركێ هه‌ڤپه‌یمانییا نێڤده‌وله‌تی ل ئیراقێ، ئه‌ڤرۆ دچیتە د قویناغه‌كا نوى دا، قویناغا باوه‌ری ب خۆبوونێ و پشتبەستنێ ب شیانێن خۆ یێن نیشتیمانی. چاڤێ مە ل هندێ یه په‌یوه‌ندییێن مە د گه‌ل ئهمریكا و وه‌لاتێن هه‌ڤپه‌یمان، ژ پێدڤیێن شه‌ڕێ دژی تیرۆرێ، بهێنه گهۆڕین بۆ هه‌ڤپشكییه‌كا دۆمدرێژ یا هه‌ڤسه‌نگ د وارێن ئه‌منی، ئابووری، وه‌به‌رهێنانێ، وزه‌یێ، په‌روه‌ردێ، ته‌كنەلۆژیا و دپلۆماسییێ دا.
هه‌ڤپشكییه‌ك لسه‌ر بنه‌مایێ به‌رژه‌وه‌ندییێن هه‌ڤپشك و ڕێزگرتنێ ل سه‌روه‌رییا ده‌وله‌تێ، ب ره‌نگه‌كى د خزمەتا هه‌مى ئیراقێ و سه‌رجه‌م پێكهاته‌یێن وێ و ئارامی و سه‌قامگیرییا ده‌ڤه‌رێدا بیت.
به‌رهه‌ڤبوویێن رێزدار،
ده‌مێ ئه‌ڤرۆ به‌حسی سه‌روه‌ریێ دكه‌ین، دڤێت ب روونی پێناسە بكهین:
سه‌روه‌ری، ب تنێ ڤه‌كێشانا هێزێن سه‌ربازی یێن بیانی نینه، به‌لكو به‌رپرسیارییه‌كا نیشتیمانییه.
سه‌روه‌ری واته ده‌وله‌ت خودانا بڕیارا دویماهیێ بیت. واته ده‌ستوور و فیدرالی بهێنه بجهئینان و سازییین ده‌ستووری مه‌رجه‌عێ هه‌مییان بن.
واته بڕیارا شه‌‌ڕ و ئاشتیێ ب تنێ د ده‌ستێ ده‌ستهه‌لاتا شه‌رعییا ده‌وله‌تێ دا بیت.
هێزا ئیراقێ د چه‌كێ ده‌رڤەی ده‌ستهه‌لاتا ده‌وله‌تێ و د ئالۆزی و نه‌سه‌قامگیریێ دا نینه. هێزا ئیراقێ د هندێ دایه ب دیالۆگ و لێكتێگەهشتنێ كێشه‌یان چاره بكه‌ت. د هندێ دایه لۆژیكێ ده‌وله‌تێ و ده‌ستووری زال بیت و هه‌ڤسه‌نگی و مافێ هه‌مى پێكهاته‌یێن وێ پاراستى بیت.
له‌ورا ئێدى ده‌مێ وێ ئێكێ هاتییە سه‌رجه‌م كێشەیێن هه‌لاویستى ل ناڤ مالا ئیراقێ، ژ په‌یوه‌ندیێن هه‌ولێر و بهغدایێ تا پرسا چه‌كی و مافێ هه‌مى پێكهاته‌یان، لسه‌ر بنه‌مایێ ده‌ستووری و ب ئیراده‌یه‌‌كا نیشتمانییا ئیراقییانه چاره بكهین، نەكو ڕێ بـده‌ین ببنە قه‌یرانێن به‌رده‌وام بۆ نڤشێن بهێت.
ئه‌م خوازیارێن ئیراقه‌كا ده‌ستوورییا فیدرال، سه‌قامگیر و خودان سه‌روه‌رییا تمامین. وه‌لاته‌ك كو بێ جوداهى پارێزه‌را ژیان و ئاسایشا هه‌مى پێكهاته‌یان و وه‌لاتییێن خۆ بیت. لسه‌ر بنه‌مایێ به‌رژه‌وه‌ندیێن هه‌ڤپشك، په‌یوه‌ندییه‌كا هه‌ڤسه‌نگ د گه‌ل جیران و دۆستێن خۆ هه‌بیت و نه‌بیتە مه‌یدانا ململانێ، به‌لكو ببیتە ناڤه‌ندا ئاشتی، دیالۆگ و سه‌قامگیریێ بۆ هه‌مى ده‌ڤه‌رێ.
ئه‌و ئیراق به‌رپرسیارییا هه‌ڤپشكا هه‌مییانە. ئه‌م ژی ل هه‌رێما كوردستانێ، وه‌‌ك هه‌رده‌م دێ هه‌ڤكار و پشته‌ڤان بین بۆ هه‌ر گاڤه‌كێ كو سه‌روه‌ری، ئاسایش و سه‌قامگیرییا ئیراقێ بهێز بێخیت. دگه‌ل حكوومه‌تا فیدرال و سه‌رجه‌م هێز و پێكهاته‌یێن ئیراقێ، ب دیالۆگێ و لسه‌ر بنه‌مایێ ده‌ستووری كار دكه‌ین؛ هه‌ڤده‌م رژدییێ لسه‌ر بهێزكرنا هه‌ماهه‌نگی و هه‌ڤكارییا د ناڤبەرا پێشمه‌رگه، سوپا و سه‌رجه‌م هێزێن چه‌كدار و ئه‌منی دا دكه‌ین.
وەرن داكو ڤێ وه‌رچەرخانێ بكه‌ینە ده‌ستپێكا باوه‌رییه‌كا بهێزتر د ناڤبەرا خۆ دا؛ ده‌ستپێكا قویناغه‌كێ كو تێدا ئیراق ب ئێكڕیزی، سه‌روه‌رییا یاسایێ و هه‌ڤپشكییا ده‌ستوورییا هه‌مى پێكهاته‌یێن خۆ، بلند و پاراستی بیت.
گه‌له‌ك سوپاسیا هه‌وه دكه‌م، هیڤیا ئێڤارییه‌كا خۆش بۆ وه دخوازم.
