دەرچوویێن چاندن و ڤێتێرنەری دێ هێنە دامەزراندن

بەلاڤ بکە

گاڤ

حکومەتا هەرێما کوردستانێ ب هزاران دەلیڤەیێن دامەزراندنێ بۆ دەرچوویێن پشکێن چاندن و ڤێتێرنەری راگەهاندن.

فەرمانگەها میدیا و زانیاری یا حکومەتا هەرێما کوردستانێ ئەڤرۆ د بەیانەکێ دا راگەهاند؛ ب مەرەما بلندکرنا کوالتیا بەرهەمێن چاندنێ و پاراستنا ئاسایشا خوارنێ و گرنگیپێدانا بازارێ بەرهەمێ خۆمالی، وەزارەتا چاندن و ژێدەرێن ئاڤێ ل سەر هەموو پرۆژەیێن چاندنێ یێن مینا روەکی، ئاژەلی، کارگەهێن پیشەسازیا خوارنی، گەڕێن ماسیان، بەرهەمئینانا هنگڤینی و کڤارکان سەپاندینە کو د بن چاڤدێریا کەسێن بسپۆر و شارەزا و چاڤدێریا وەزارەتا چاندنێ دابن داکو بەرهەمێن وان ب کوالتیەکا ساخلەم بن و راپۆرتا هەیڤانە ژی بۆ وەزارەتێ بهێتە هنارتن.

ژێدەری دایە زانین ژی: ل گۆرەی یاسایێ، نابیت چ پرۆژەیێن چاندنێ بێی چاڤدێریا کارمەندەکێ دەرچوویێ کۆلیژێن چاندن یان ڤێتێرنەری کار بکەن، ژبەر ڤێ یەکێ وەزارەتا چاندنێ فۆرمەک بۆ دەرچوویێن کۆلیژ و پەیمانگەهێن چاندن و ڤێتێرنەری ل سالا 2022یێ بەلاڤ کریە بۆ دانانا وان ل سەر پرۆژەیان ب رەنگەکێ گرێبەست و تا نوکە 11 هزار و 23 فۆرم هاتینە پرکرن.

رزگار حەمە خدر، شیرەتکارێ وەزارەتا چاندن و ژێدەرێن ئاڤێ بۆ فەرمانگەها میدیا و زانیاری گۆت: هەموو فۆرم هاتینە داتابەیسکرن و ب سەر پارێزگەهان دا هاتینە بەلاڤکرن، هەولێر، 1900 فۆرم، سلێمانی 4000 فۆرم، دهۆک 2700 فۆرم، هەلەبجە 444 فۆرم، راپەرین 700 فۆرم، گەرمیان 900 فۆرم، زاخۆ 500 فۆرم و سۆران 124 فۆرم، ژ ڤێ ژمارێ ٪76.7 یا کچان ئەو فۆرمە پر کرینە و هەر ئێک ژ وان بکەڤیتە کاری نابیت مووچەیێ وان ژ 350 هزار دیناران کێمتر بیت.

هەروەسا دیار کر، خۆلێن راهێنانان بۆ وان دەرچوویێن فۆرم پر کرین هاتینە ڤەکرن و دێ هێشتا هێنە ڤەکرن و ل دوماهیا خۆلان دێ هەلسەنگاندن بۆ هێتە کرن، ئەگەر دەرنەچوون، دێ دوبارە مافێ پشکداریکرنێ پێ هێتە دان.

شیرەتکارێ وەزارەتا چاندن و ژێدەرێن ئاڤێ دا زانین ژی ئەگەر خودانێ پرۆژەیی ئەرکێن خۆ ل هەمبەر سەرپەرشتیاری بجهنەئینیت، سەرپەرشتیار دشێت سکالایێ تۆمار بکەت، هەروەسا هەیڤانە سەرپەرشتیار دێ راپۆرتێ هنێریتە وەزارەتێ و ئەگەر پرۆژەی کێشە هەبن و یێ گونجای نەبیت، دێ رێکار هێنە وەرگرتن، بەروڤاژی ژی ئەگەر سەرپەرشتیار ژی د کارێ خۆ دا خەمسار بوون، دێ هێنە سزادان.

 

 

More About