د. جه‌مال كۆچه‌ر: تا 3 سالێن دى ژى بهایێ دۆلارى ناهێته‌ دبن 120 هزار دیناران دا

بەلاڤ بکە

گاڤ
ئەندامه‌كێ پەرلەمانێ ئیراقێ راگه‌هاند: پارێزگارێ بانكا ناڤه‌ندى دەستهەلاتێن گوهۆڕینا بهایێ دۆلاری بەرانبەر دیناری نینن و بلا خەلک ل ژڤانی نەبیت تا سێ سالێن دی ژی بهایێ ئێک دۆلار بچیتە د بن 1200 دیناران دا.
ب بریارا محەمەد شیاع سوودانی، سەرۆکوەزیرێ ئیراقێ پارێزگارێ بەنکا ناڤەندی یا ئیراقێ هاتە لادان و عەلی عەلاق ل جهێ وی هاتە دانان، لێ ب گۆتنا د. جەمال کۆچەر، ئەندامێ پەرلەمانێ ئیراقێ و ئەندامێ لژنەیا دارایی ل پەرلەمانی، گوهۆڕینا پارێزگارێ بەنکێ چ کارتێکرنێ ل بهایێ دۆلاری بەرانبەر دیناری ناکەت، ژبەر چار ئەگەران.
د. جەمال کۆچەر وان ئەگەران ب ڤی رەنگی رێز دکەت: 
1- رەڤاندنا دۆلاری ل خالێن سنۆری یێن ئیراقێ و هەرێما کوردستانێ هەیە.
2- بەنکێن سەر ب حزبێن سیاسی ڤە گوهێ خۆ نادەنە بریارێن بەنکا ناڤەندی و ل گۆرەی پێدڤیاتیێ سەرەدەریێ ل گەل بەنکا ناڤەندی ناکەن.
3- پارێزگارێ بەنکا ناڤەندی دەستهەلاتێن تەمام بۆ گوهۆڕینا بهایێ دۆلاری بەرانبەر دیناری نینن.
4- ئەمریکا ژمارەکا مەرجان داینە ئیراقێ و بلندبوونا بهایێ دۆلاری پەیوەندی ب وان مەرجان ڤە هەیە.
دەربارەی نووچەیێن بەلاڤ دبن و دبێژن کو بلندکرنا بهایێ ئێک دۆلارێ ئەمریکی ژ 1200 دیناران بۆ 1450 دیناران پەیوەندی ب رێککەفتنەکا د ناڤبەرا حکومەتا ئیراقێ و سندۆقا دراڤی یا نێڤدەولەتی ڤە هەیە، د. جەمال کۆچەر دبێژیت: سندۆقا دراڤی یا نێڤدەولەتی چ رێککەفتنێن ب وی رەنگی ل گەل ئیراقێ نینن، بتنێ شیرەت ل ئیراقێ کریە کو گەر وێ گاڤێ نەهاڤێژیت، دێ ئابۆرێ وێ بەر ب ژناڤچوونێ چیت.
دەربارەی پێشبینیێن دەما کێمبوونا بهایێ دۆلاری بەرانبەر دیناری، ئەو ئەندامێ لژنەیا دارایی یا پەرلەمانێ ئیراقێ پێشبینی ناکەت تا دەما سێ سالێن دی ژی بهایێ ئێک دۆلار بچیتە د بن 1200 دیناران دا، ژبەر کو بودجەیا تەشغیلی یا حکومەتا ئیراقێ زۆرە و رێژەیەکا مەزن یا گەندەلیێ هەیە.
بریارە شاندەکا ئیراقێ بۆ بابەتێ بهایێ دۆلاری و سەرەدەریا ئەمریکا ل گەل بەنکێن ئیراقێ بچیتە ئەمریکا، د. جەمال کۆچەر دەربارەی سەرەدانا وێ شاندێ دبێژیت: شاند دێ داخواز ژ ئەمریکا کەت تا رۆژا 1-6-2023یێ دەرفەتێ بدەتە ئیراقێ داکو چاکسازی بهێنە کرن، لێ ب گۆتنا وی ئەگەر ئەمریکا وێ دەرفەتێ بدەت ژی، چاکسازی ناهێنە کرن و حزبێن سیاسی یێن ئیراقی دخوازن ئەو دەرفەت بهێتە دان داکو بشێت بودجەیا سالا 2023یێ ژی بدزن.

More About