جاره‌كا دى نێزیكى ملیۆن دۆلارێن خه‌لكێ دهۆكێ چوون

گاڤ – تایبه‌ت
جاره‌كا دى نێزیكى ملیۆن دۆلارێن خه‌لكێ دهۆكێ دیار نامینن و گاڤ زانیه‌ كو كه‌سه‌كى ب به‌هانه‌یا بازرگانیكرنێ ئه‌و پاره‌ ژ خه‌لكى وه‌رگرتینه‌ و پتریا قوربانیان فەرمانبەرێن حکومه‌تێ نە. 
گاڤ ل گۆرەی ژێدەرەکێ تایبەت زانی یە: مافپەروەرەکی ل ئێک ژ رێڤەبەرییێن پارێزگەها دهۆکێ فەرمانبەرێن رێڤەبەریا خۆ و ژمارەکا دی یا رێڤەبەریان رازی کرینە کو کۆژمێن مەزن یێن پارەی رادەستی وی بکەن داکو بازرگانیا دەرمانان پێ بکەت و قازانجەکا زێدە بدەتە وان.
ژێدەرێ گاڤ خۆیا دکەت: وی مافپەروەری پتری 500 هزار دۆلاران ب تنێ ژ فەرمانبەرێن رێڤەبەریا خۆ وەرگرتینە، هه‌روه‌سا پترى 200 هزار دۆلاران ژی ژ فەرمانبەرێن رێڤەبەریەکا دی یا دهۆكێ وەرگرتینە و پارێ خه‌لكێ دى ژى د ناڤ دایه‌.
د دیڤچوونا گاڤ دا دیاربوویه‌ كو پشتی وی مافپەروەری ئەو کۆژمێ پارەی بری، هندەک ژ فەرمانبەران داخوازا ڤەگەڕاندنا پارەیێ خۆ کریە، لێ وی پارە نەبوون ڤەگەڕینیت و دبێژیتە وان فەرمانبەران "ئەڤە بازرگانی یە، ئەز خوسارەت بووم، لێ دێ پارەیێن وە ڤەگەڕینم" لێ تا نوکە پارەیێ وان نەهاتیە ڤەگەڕاندن.
گاڤ پرسیاركریه‌ ئه‌رێ وان فه‌رمانبه‌ران سكالا تۆماركرینه‌، دیاربوویه‌ كو ئه‌و كه‌سێ پاره‌ برین گۆتیه‌ فه‌رمانبه‌ران هه‌ر كه‌سێ بۆ میدیایێ باخڤیت یان ژى سكالایێ تۆمار بكه‌ت دێ ب ئێكجارى ژ پاره‌یێ خۆ بێ به‌هربیت. 
د ڤێ ده‌ربارێ دا گاڤ په‌یوه‌ندى ب پۆلیسێن پارێزگه‌ها دهۆكێ كر، لێ دیاربوویه‌ كو ل سه‌ر ڤى كه‌یسى چ سكالا ل سه‌ر وى مافپه‌روه‌رى نه‌هاتینه‌ تۆماركرن.