رزگار حەمید شەریف

شەش پارتێن ئوپۆزسیۆنا تورکیا کو ب هەڤپەیمانیا “میللەت” دهێنە ناسکرن، کەمال کلیچدار ئۆغلۆ، سەرۆکێ پارتیا CHP  کرنە بەربژێرێ خۆ بۆ سەرۆکكۆمارێ تورکیا کو دێ ل هەیڤا پێنجا ئەڤ سالە هێنه‌ كرن، بەرامبەر هەڤپەیمانیا “جمهوریەت” یا پارتا MHP یا نەژاد پەرەست و پارتا AKP ب سەرۆکاتیا رەجەب تەیب ئەردۆغان. بەرپرسێن پایەبلندێن پارتا پرۆ کوردی HDP ژی ب نە فەرمی پشتگیریا خۆ بۆ کاندیدکرنا کلیچدار ئۆغلۆ دیارکرن.

دناڤ هەر دو هەڤپەیمانیا دا دو هێز هەنە کو ئینکار ل هەبوونا پرسگرێکا کورد دکه‌ن. دناڤ هەڤپەیمانیا میللەت پارتیا IYI کو دژی هاتنا HDP بوو بۆ ناڤ هەڤپەیمانیا وان و نەخواست پرسگرێکا کورد بکەتە ناڤ مژارێن دان و ستاندناندا. پارتیا نەژادپەرەستا MHP ژی هەبوونا وێ ل سەر نەبوونا کوردانە. ڤێ پارتیێ شیایە پشتی هەڤپەیمانی ل گەل AKP ل دژی کوردان بكه‌ت، چەندین سیاسەت ل دژی کوردان پیادە كرن، ژوان دانانا قەیومان ل جهێ رێڤەبەرێن باژێرڤانیان ، کێمکرنا ب کار ئینانا ده‌سته‌واژه‌یا هەرێما کوردستانێ و زیندانیکرنا پەڕلەمەنتارێن     HDP ژوان سەلاحەدین دەمیرتاش.

دهەلبژارتنێن بەروەختێن سەرۆک کۆماریا تورکیا دا کورد و ئالیگرێن پارتا HDP ئێکلاکەرن بۆ دیارکرنا سەرۆک کۆمارێ داهاتی. کوردان شیا ل سالا ٢٠١٩ ل ئیستەنبولێ دو جاران پشتا بەربژێرێ ئەردوغانى بشکێنن ب دەنگدان ب ئەکرەم ئیمام ئۆغلۆ ، بەربژێرێ CHP بۆ والیاتیا ئیستەنبولێ.

کوردێن باکۆر باشترە نە چنە د ناڤ چ هەڤپەیمانیەکێ دا بەری هەلبژارتنان و ئازادیێ بدەنە دەنگدەرێ خۆ بۆ دەنگدانێ و ب مەرجێن خۆ بچنە ناڤ وەرگرتنا دەستهەلاتێ پشتی هەلبژارتنان. چوونا HDP بۆ ناڤ دەستهەلاتێ دێ رێگری ل سیاسەتێن دژی کوردان ئینت و بیتە ئەگەرێ ب هێزکرنا پێگەهێ کوردان. دئەسلدا چ جوداهیەک دناڤبەرا کلیچدار ئۆغلۆ و ئەردۆغانى دا نینە ل دەمێ دو پارتێن دژبەرى کوردان MHP و IYI دگەل وان بن. پارتا HDP باشترە ببیتە جێگرێ ڤان دو پارتیان پشتی ئەنجامێن هەلبژارتنان و دگەل ئالیێ سەرکەفتی هەڤپەیمانیێ گرێ ب دەت.