گاڤ

بهايێن په‌ترۆلێ د بازارێن جيهانى دا ئه‌ڤرۆ چارشه‌مبيێ گه‌هشتنه‌ نزمترين ئاست هه‌ر ژ هه‌يڤا ديسه‌مبه‌رێ يا سالا 2021 تا نوكه‌.

ئاژانسان به‌لاڤكرينه‌؛ بهايێن په‌ترۆلێ ئه‌ڤرۆ ئێڤارى ب رێژه‌يا پتر ژ 5% ژ به‌ر نيگه‌رانيێن ل دۆر ژناڤچوون و ئيفلاسبوونا به‌نكان و ب تايبه‌ت پشتى ئيفلاسبوونا به‌نكا سيليكۆن ڤالى و نزمبوونا بهايێ پشكێن به‌نكا Credit Suisse ب پتر ژ 30% داكه‌فتن.

سه‌ره‌راى زێده‌بوونا داخوازيا چينێ ل سه‌ر په‌ترۆلێ لێ نه‌پشتراستيا د كه‌رتێ به‌نكى يێ جيهانى دا بوويه‌ ئه‌گه‌رێ داكه‌فتنا بهايێن په‌ترۆلێ ب پتر ژ 5% هه‌روه‌سا نزمبوونا سيگنالێن وول ستريت جۆرنال ب پتر ژ 1%.

گرێبه‌ستێن پاشئێخستى يێن خاڤا برێنت ب 3.53 دۆلاران و ب رێژه‌يا 4.6% داكه‌فتن و بهايێ به‌رميله‌كێ خاڤا برێنت هاته‌ ب 73.92 دۆلاران.

هه‌ڤده‌م گرێبه‌ستێن پاشئێخستى يێن خاڤا رۆژئاڤايێ تكساس يا ناڤنجى يا ئه‌مريكى ب 3.46 دۆلاران و ب رێژيا 4.9% داكه‌فتن و بهايێ به‌رميله‌كێ خاڤا تكساس هاته‌ ب 67.87 دۆلاران.

هه‌ردو خاڤێن برێنت و تكساس ئه‌ڤرۆ گه‌هشتنه‌ نزمترين بهايێن خۆ هه‌ر ژ ديسه‌مبه‌را سالا 2021.

بهايێن په‌ترۆلێ د هه‌يڤێن 1 و 2 دا ژ ئه‌ڤ ساله‌ ژ به‌ر زێده‌بوونا داخوازيا چينێ ل سه‌ر پشتى دوباره‌ بهێزبوونا چالاكيێن ئابوورى هه‌ڤده‌م ل گه‌ل نه‌هێلانا رێكارێن به‌رسينگگرتنا ڤايرۆسێ كۆرۆنايێ بلند ببوون.