جاسم سه‌برى

مێژوو دەربارەی رۆژا 21 ئادارێ (نەورۆزێ ) چ بێژت یان ب چ ڕویدان و بەلگە و رهـ و ریشالان ڤە گرێبدت، مادەم دنهادا گەلێ کورد ب جەژنا خوە دزانن و هەرسال دناڤا کوردان دا ئەڤ رۆژە ب ئاهەنگ و کەرنەڤال و سەیرانان دهێتە ساخکرن، و وەک جەژنەکا نەتەوەیی سەرەدەری دگەل ڤێ رۆژێ دهێتە کرن، ئێدی نەگرنگە کا نڤیسکارەک یان ڤەکۆلەرەک یان هەر چ دیرۆکنڤیس و مێژوو نڤیسەکێ هەی ب پارجە تێکست و ڤەکولینەکێ ئەڤێ رۆژێ ب چ رویدان و بەلگە و گەل و نەتەوەیێن دیڤە گرێبدەت، چونکی دنهادا دیفاکتویەک هەیە ئەو ژی نەورۆز جەژن و سەرسالا گەلێ کوردە .

هەر چ دیرۆک و مێژووا مە هەی گەلێن داگیرکەر بۆ خوە برن و مێژووا مە و زمانێ مە ژمە دزی و هەرچی خرابکاری و کرێتیا د مێژووێ دا هەی بومە هێلا و جوانی و مێرانیا گەلێ مە بۆ خوە بر لێ کەسێ دەینەکر، ماچیە ئەگەر ئەم ژی پشتا خوە بدن دیرۆکێ و ل رهـ و ریشال و چیرۆکێن نەورۆزێ نەگەرن و  بهێلن ئەڤ رۆژە هەردەم هۆسا بمینت زیندی و گەلێ مە وەک جەژنەکا نەتەوەیی پیرۆز ڕاگرن .

پتریا رۆژێن سەروەری و نەتەوەیێن وەلاتێن جیهانێ ب ئەڤسانە و چیرۆک و چیڤانۆکێن نەراست و تژی ژ فانتازیایێ ڤە گرێداینە، لێ ب شانازیڤە رۆژێن خوە یێن نەتەوەیی پیرۆز ڕادگرن و پشتا خوە ددن مێژووێ، د پتریا بەلگەیێن دیرۆکێ دا نەورۆز ڤەرێژا نەمانا زولم و زورداریێ یە یان سالناما دەسپێکا وەرزێ بهارێ یە و بچەندین چیرۆکێن شورش و بەرخوەدان و قەهرەمانی و خوەراگریێ ڤە گرێدایی یە وەکە ڕویدانەکا مێژووی یا گەلێن ئاری یان بێژین گەلێن جوگرافی ئیران دهێتە نیشاندان .

لێ دناڤا ئەڤان گەلان هەمیان دا گەلێ کورد ل ئەڤێ رۆژێ خودان دەرکەفت و وەکە جەژنەکا نەتەوەیی پیرۆز راگرت و وەکی سالناما کوردی سەرەدەری دگەل ئەڤێ چەندێ کر، ئەڤەژی جهێ دلخوەشیێ یە، د ڤان چەند سالێن بوریدا گەلێ تورکیا چەندین هەول دان کراسێن تورکی بکن بەر ئەڤێ رۆژێ و خوە لێ بکن خودان لێ نەشیان و چەندین گەلێن دیتر هەولدان ئەڤێ رۆژێ ژ کوردان بستینن لێ نەکارین وەکە گەلێ کورد ڕەنگڤەدان و دەنگڤەدانێ لڤێ رۆژێ بکن، دنهادا ل جیهانێ هەمیێ ئەڤ جەژن و سەرسالە ب کودان دهێتە نیاسین و وەکە جەژنەکا نەتەوەیی یا کوردان دهێتە زانین .

ئەڤجا بانگ ل هەمی نڤیسکار و ڤەکولەر و دیرۆکنڤیسان دکم لاپەرێن خوە بدن ئێک و ل تشتەکێ دی یێ دیرۆکێ بگەرن مینا نەورۆزێ جهێ سەروەری و پیرۆزیێ بت بۆ گەلێ مە، بهێلن ئەڤا هەی وەکە خوە بمینت و نەورۆز ببت جهێ دلنەرحتیا داگیرکەرێن گەلێن کورد و ئاگرێ نەورۆزێ هەردەم ددلێ نەحەزێن گەلێ مەدا بمینت گەش