لوقمان ئاسیهى

تنێ ئەو مابوو، سیباقا (ب پێیا)ن چوونا دەف ئەڤی جامێری و جامێرێ هە داکو وێنەیەکێ دگەل جەنابێ وى بگرن. ژدل دێ بێژم، ب راستا ئەم شەعبەک نوزا چاوانین، نێ ئەز نوزانم چ مفا تێدەیە و ئانکۆ چ تو ژ ئەڤێرێ ب پێیان بچییە هەولێرێ یان سلێمانیێ تنێ دا تو وێنەیەکێ دگەل (جەناب)ەکى بگرى؟! ئەگەر تو بێژی وەفادارییە، ئەز ل ئەوێ مەسەلێ ب گۆمانم و ل دەف من ب خوە نە کارەکى شارەستانییە و بێهنەکا نەخوەش ژێ دئێت. ئەز ژ چو ناتڕسم سوبە جماعەتێن هەمى حزبان، هەر ئێک ژ رەخێ خوە ڤە راهێلتە ئەوى کارى و ب پێیان قەستا مەزنێن حزبێن خوە بکن و وێنەیان دگەل بگرن، ئانکو جۆرەکی دى یێ سیباقێ و هەڤڕکیێ ووووو دناڤا مە دە پەیدا ببت!!

ب من وەرە کارێن ب ئەڤی ئاوایی پتریا جاران ژ رەنگە بەتالییەکێ پەیدا دبن. ئاخر پتریا مە حەز ژ سومبلێن خوە یێن نەتەوەی دکن و رێزێ لێ دگرن، بەس بۆچى ئەم ب رەنگەکى مودێرن سەرەدەریێ دگەل ئەڤان بابەتان ناکين و چاڤ ل وەلات و ل وەلاتی و بەرپرسێن رۆژئاڤا ناکن نەک یێن عەرەب و رۆژهەلاتى؟ ئەڤ پرسیارا من يا سەرى بۆ وان هێژایانە یێن ب پێیان بۆ گرتنا وێنەیەکێ رێیێن درێژ دبڕن هەروەسا بۆ وان بەرپرسێن هێژایە ژى یێن وێنەیان دگرن. نوکە گەلەک ئاساییە وەکى بەرپرسەک یان هەر کەسەکێ/کەسەکا ب ناڤودەنگ دئێتە ناڤ خەلکى ب گشتى یان ناڤ جەماوەرێ خوە، ئیمزایێن وان وەربگرن یان وێنەیان دگەل بگرن یان بچن دەستێ وان و دگەل بکەنن و بئاخڤن لێ ئەڤا دیتر یا ژ من ڤە تشتەکێ زێدەیە و دوورە ژ هەمى ئەتەکێتێن شارستانى و ب من وەرە ئەگەر رێ بۆ بێتە خوەشکرن ل دەمەکێ نێزیک دێ بتە کەلتۆر و خەلکێ بەتال ژى مشەیە!!