راپۆرتهكا ئهمریكى ئهگهرێن دهستپێنهكرنا هنارتنا پهترۆلا ههرێما كوردستانێ دیار دكهت
بەلاڤ بکە
گاڤ
راپۆرتهكا ئهمریكى ب پشتبهستن ب ژمارهیهكا شارهزایان ئاماژه دایه ئهگهرێن دهستپێنهكرنا هنارتنا پهترۆلا ههرێمێ ب رێكا توركیا و فاكتهرێن گرێداى ڤێ چهندێ.
راپۆرتهكا تۆڕا CNBC یا ئهمریكى چار ئهگهر بۆ دهستپێنهكرنا هنارتنا پهترۆلا ههرێمێ رێزكرینه و تێدا هاتیه "بهرپرسێن توركى دڤێن ههرێما كوردستانێ و ئیراق بگههنه رێككهفتنهكا ڤهبڕ بۆ چارهكرنا ناكۆكیێن یاسایى دا كو ئهنقهره رویبروى چ كێشهیێن یاسایى نهبیت".
زێده ژى كریه "توركیا دبینیت كو رێككهفتنێن ههولێر و بهغدا ل دۆر پهترۆلێ د سیاسى نه و نهك ب شێوهیێ رێسا و یاسایانه".
راپۆرتێ ئاماژه ب وێ چهندێ ژى كریه "ههلبژارتنێن توركیا ئهگهرهكێ دى یێ دهستپێنهكرنا هنارتنا پهترۆلا ههرێمێ یه و تا ب دویماهیك هاتنا گهڕا دوێ یا ههلبژارتنێن سهرۆككۆمارێ توركیا ل 28ى ڤێ ههیڤێ ئهڤ پرۆسێسه دهستپێناكهت".
ههروهسا راپۆرتێ ژ هندهك شارهزایان ڤهگوهاستیه كو "سكالایا ئیراقێ ل سهر توركیا ل دۆر وێ پهترۆلا ژ سالا 2018 وێڤه ژ ههرێمێ هاوردهكرى، ئێك ژ ئهگهرێن دى یێن نهدهستپێكرنا پهترۆلا ههرێمێ یه".
ههروهسا خۆیا ژى كریه "هندهك كێشهیێن تهكنیكى ژى ههنه كو پێدڤیه دناڤبهرا ههولێر و بهغدا دا چاره ببن، سهرهراى ههبوونا ههڤبهستهكا دهستپێكى، لێ هویركاتیێن ل دۆر چهوانیا بهرههمئینانا پهترۆلێ و لایهنێ كونترۆلێ ل سهر داهاتى دكهت، تا نوكه د زهلال نینن".
راپۆرتێ ئاشكرا ژى كریه كو ئهگهر ئهردۆگان د ههلبژارتنان دا بسهرنهكهڤیت، دێ راوهستیانا هنارتنا پهترۆلا كوردستانێ بهردهوام بیت چونكى رهنگه كلیچدار ئوغلۆ داخوازا پێكئینانا دانوستاندنێن نوى ل گهل ئیراقێ و ههرێما كوردستانێ بكهت.
ههر ژ 25ى ئادارا بۆرى، توركیا هاوردهكرنا پهترۆلا كوردستانێ پشتى بڕیارا دهستهیا ناڤبژیڤانیێ یا گرێداى ژوورا بازرگانى یا نێڤدهولهتى ل پاریس راوهستاندیه.
ل گۆرهى وێ بڕیارێ، توركیا ب دانا 1.5 ملیار دۆلاران بۆ ئیراقێ ژ بهر هاوردهكرنا پهترۆلا ههرێمێ ژ سالا 2014 تا سالا 2018 بهروڤاژى رێككهفتنا بۆریێن پهترۆلێ یا سالا 1973 هاتبوو سزادان.
ههرچهنده ل 4ى ههیڤا نیسانێ یا بۆرى حكومهتێن ههرێمێ و ئیراقێ رێككهفتنهك بۆ دوباره هناردهكرنا پهترۆلا ههرێمێ بۆ ژ دهرڤه ب رێكا كۆمپانیا سومۆ یا فیدرالى ئیمزا كربوون، لێ تا نوكه توركیا رێك نهدایه هناردهكرنا پهترۆلا ههرێما كوردستانێ.
ئاژانسا رۆیتهرز ژ بهرى دو رۆژان دیاركربوو كو زیانێن راوهستیانا هنارتنا پهترۆلا ههرێمێ ب رێكا توركیا گههشتینه پتر ژ 1.5 ملیار دۆلاران.
