گاڤ

یاریكه‌ره‌كێ هه‌لبژارتیێ غانا و یانه‌یا ئێگناتیا یا ئه‌لبانى د ده‌مێ برێڤه‌چوونا یاریه‌كا یانه‌یا خۆ د خۆلا ئه‌لبانیا دا گیانێ خۆ ژده‌ستدا.

ل گۆره‌ى ئاژانسێن نووچه‌یان "رافائێل دوامینا یێ 27 سالى پشتى بۆرینا 24 خۆله‌كان ژ یاریه‌كا یانه‌یا خۆ ئێگناتیا د خۆلا ئه‌لبانیا دا ئاگه‌هـ ژ خۆ نامینیت و سه‌ره‌راى بزاڤێن تیمێن پزیشكى بۆ قۆرتالكرنا وى، گیانى خۆ ژده‌ستدا".

دیار ژى كرینه‌ "ل سالا 2020ێ، نشته‌رگه‌ریه‌ك بۆ یاریكه‌رى هاتبوو كرن و ئامیره‌یه‌ك د دلێ وى دا هاتبوو دانان كو ل وى ده‌مى وى یارى بۆ یانه‌یا زاراگۆزا یا ئسپانى دكر و بۆ ده‌مێ سێ سالان ژ یاریگه‌هان دویركه‌فتبوو، نوشداران شیره‌ت لێ كربوو كو یاریێ نه‌كه‌ته‌ڤه‌، لێ ئه‌و یاریكه‌ره‌ یێ رژد بوو دوباره‌ بۆ یاریكرنێ بڤه‌گه‌ڕیت".

ئێكه‌تیا ئه‌لبانیا یا ته‌پاپێى خه‌مگینیا خۆ ب رویدانێ ده‌ربڕى و بڕیارا پاشئێخستنا هه‌مى یاریێن خۆلا ناڤخۆیى بۆ ده‌مێ حه‌فتیه‌كێ دا.

هه‌روه‌سا ئێكه‌تیا غانا یا ته‌پاپێى، ده‌سته‌یا خۆلا ئسپانیا و زاراگۆزا یانه‌یا وى یا به‌رێ خه‌مگینیا خۆ ب وه‌غه‌ركرنا وى یاریكه‌رى ده‌ربڕین.