گاڤ

ژماره‌یه‌كا راپۆرتێن میدیایى دیاركرینه‌ كو لوكا مۆدریچ ستێرا كرواتى یێ یانه‌یا ریال مه‌درید بڕیار دایه‌ ل هاڤینا بهێت رێزێن یانه‌یێ بهێلیت.

گرێبه‌ستا مودریچ یێ 38 سالى ل گه‌ل ریال مه‌درید ل دویماهیا ڤى وه‌رزى ب دویماهیك دهێت.

به‌رى نوكه‌ بریكارێ كارێن مودریچى دیاركربوو كو ژماره‌یه‌كا ئۆفه‌ران بۆ مۆدریچى ژ ژماره‌یه‌كا یانه‌یان هاتینه‌، هه‌روه‌سا ئه‌و ده‌نگۆیه‌ ژى به‌لاڤبوویه‌ كو ئه‌و دێ بۆ یانه‌یه‌كا سعوودى یاریێ كه‌ت، هه‌ڤده‌م راپۆرتێن میدیایى ئاماژه‌ ب هێلانا مۆدریچى بۆ رێزێن ریال مه‌درید داینه‌.

رۆژنامه‌یا The Sun یا بریتانى به‌لاڤكریه‌ "لۆكا مۆدریچ یێ ڤه‌كریه‌ ل سه‌ر هزرا یاریكرنێ ل رۆژهه‌لاتا ناڤین ئه‌گه‌ر ئۆفه‌ره‌كا گونجاى بۆ وى بهێت".

خۆیا ژى كریه‌ "دهێته‌ چاڤه‌رێكرن یانه‌یێن سعوودى بزاڤێن خۆ بۆ ڤه‌گوهاستنا مۆدریچى ل مێركاتۆیا ڤێ زڤستانێ دوباره‌ بكه‌ن و ئه‌گه‌ر ریال مه‌درید ل سه‌ر رازى نه‌بیت، دێ خۆ گرن هه‌تا ب دویماهیك هاتنا گرێبه‌ستا وى".

مۆدریچ هه‌ر ژ ده‌ستپێكا ڤى وه‌رزى ب تنێ پشكدارى د شه‌ش یاریان دا ل گه‌ل ریال مه‌درید كریه‌.