گاڤ

رازى شنێل راهێنه‌رێ هه‌لبژارتیێ ئۆلۆمپى یێ ئیراقێ 25 یاریكه‌ر بۆ هه‌لبژارتیێ ئیراقێ یێ د بن 23 سالیێ دا بۆ جاما ئاسیا ل ده‌وحه‌ پایته‌ختێ قه‌ته‌رێ یا ده‌ربازكه‌ر بۆ یاریێن ئولۆمپى یێن پاریس یێن ئه‌ڤ ساله‌ 2024 گازیكرن و ژماره‌یه‌كا یاریكه‌رێن كورد ژى دناڤ دا هه‌نه‌.

عه‌بدولجه‌بار هاشم رێڤه‌به‌رێ كارگێرى یێ هه‌لبژارتیێ ئولۆمپى یێ ئیراقێ ئه‌ڤرۆ چارشه‌مبیێ راگه‌هاند؛ 25 یاریكه‌ر بۆ جاما ئاسیا هاتنه‌ گازیكرن ئه‌و ژى هه‌ر ئێك ژ (كه‌میل سه‌عدى، حسێن حه‌سه‌ن، حه‌سه‌ن عه‌باس، زه‌ید ته‌حسین، ئه‌حمه‌د مكنزى، یووسف ئیمام، رۆمان دولاشى، عه‌لى موسه‌وى، بلند ئازاد، كه‌رار سه‌عه‌د، مونته‌زه‌ر عه‌بدولئه‌میر، هه‌لو فایق، زه‌ید ئیسماعیل، نیهاد محه‌مه‌د، كه‌رار محه‌مه‌د، عه‌لى جاسم، موسته‌فا سه‌عدوون، ئه‌مین حه‌مه‌وى، ریزا فازل، مونته‌زه‌ر محه‌مه‌د، محه‌مه‌د هه‌یسه‌م، سالم ئه‌حمه‌د، حسێن عامر، عومه‌ر مجباس و حه‌سه‌ن خالد).

هه‌لبژارتیێ ئولۆمپى یێ ئیراقێ د جاما ئاسیا دا دێ ل گه‌ل هه‌ر ئێك ژ سعوودیه‌، تاجیكستان و تایلاند یاریێ كه‌ت.

جاما ئاسیا یا هه‌لبژارتیێن د بن 23 سالیێ دا ل 15ى ڤێ هه‌یڤێ دێ ل قه‌ته‌رێ ب پشكدارییا 16 هه‌لبژارتییان ده‌ستپێكه‌ت، هه‌ر سێ هه‌لبژارتیێن رێزێن ئێكێ، دوێ و سیێ بده‌ستڤه‌دئینن دێ ئێكسه‌ر ده‌رباز بنه‌ قاره‌مانییا ته‌پاپێى ژ ئولۆمپیادێن پاریس 2024 و هه‌لبژارتیێ خۆدانا رێزا چارێ دێ به‌ره‌ڤ ئه‌نجامدانا یارییا پاشكۆ ژ بۆ ده‌ربازبوونێ بۆ ئولۆمپیادێن پاریس ڤه‌ چیت.