مفایێن برێڤه‌چوونێ بۆ پتر ژ 10 هزار گاڤان رۆژانه
بەلاڤ بکە
گاڤ
برێڤه‌چوونا پتر ژ 10 هزار گاڤان رۆژانه ژماره‌یه‌كا مفایێن ساخله‌مییێ هه‌نه، بۆ نموونه؛ ساخله‌مییا دلى و بۆرییێن خوینێ دپارێزیت و مه‌ترسییا تووشبوونێ ب جه‌لته‌یان كێم دكه‌ت.
هه‌روه‌سا برێڤه‌چوونا پتر ژ 10 هزار گاڤان رۆژانه دبیته ئه‌گه‌رێ كێمبوونا فشارا خوینێ، پاراستنا كێشا له‌شى یا ساخله‌م، باشتربوونا گێولى و باشتربوونا ساخله‌مییا گشتى.
ل گۆره‌ى راپۆرته‌كا مالپه‌رێ Times of India؛ برێڤه‌چوونا پتر ژ 10 هزار گاڤان رۆژانه ژماره‌یه‌كا مفایێن ساخله‌میێ هه‌نه وه‌كى:
- باشتربوونا ساخله‌مییا سیهێن هه‌ناسه‌دانێ: برێڤه‌چوون ب شێوه‌یه‌كێ رێكخستى دبیته ئه‌گه‌رێ زێده‌بوونا شیانێن سیهێن هه‌ناسه‌دانێ ئانكۆ مرۆڤ دێ شێت پتر ئوكسجینێ هه‌لكێشیت ل گه‌ل هه‌ر هه‌ناسه‌دانه‌كێ وه‌كى لێكۆلینه‌كێ دیاركرى.
- باشتربوونا ساخله‌مییا دلى: ل گۆره‌ى لێكۆلینێن ده‌سته‌یا دلى یا ئه‌مریكى، برێڤه‌چوونا 10 هزار گاڤان ب كێماسى رۆژانه دبیته ئه‌گه‌رێ كێمبوونا مه‌ترسییا تووشبوونێ ب نه‌خۆشییێن دلى ب رێژه‌یا 50% هه‌روه‌سا نزمبوونا فشارا خوینێ.
- كێمبوونا مه‌ترسییا تووشبوونێ ب جه‌لته‌یێن مێشكى ل ده‌ف ژنان: ل گۆره‌ى لێكۆلینه‌كا د كۆڤارا Stroke دا به‌لاڤبووى؛ ئه‌و ژنێن بۆ 10 هزار گاڤان یان پتر رۆژانه برێڤه‌چووین، مه‌ترسییا تووشبوونا وان ب جه‌لته‌یێن مێشكى كێمبوویه.
- خۆپاراستن ژ نه‌خۆشییا شه‌كرێ: ل گۆره‌ى لێكۆلینه‌كا د كۆڤارا Diabetologia دا به‌لاڤبووى؛ برێڤه‌چوونا 10 هزار گاڤان رۆژانه مه‌ترسییا تووشبوونێ ب نه‌خۆشییا شه‌كرێ ب رێژه‌یا 50% كێم دكه‌ت.
راپۆرتا Times of India دیار ژى كریه كو برێڤه‌چوونا 10 هزار گاڤان رۆژانه ژماره‌یه‌كا مفایێن دى ژى یێن ساخله‌مییێ هه‌نه وه‌كى: باشتكرنا گێولى و كێمكرنا نیگه‌رانییێ، هاریكاره بۆ كێمكرنا كێشا له‌شى، هاریكاره بۆ باشتركرنا كوالێتییا نڤستنێ و كارێ سیسته‌مێ به‌رگرییێ یێ له‌شى باشتر دكه‌ت.