ئیران: بەرهەڤین دانۆستاندنان دگەل ئەمریکا بکەین
بەلاڤ بکە
گاڤ
سەرۆکێ نووی یێ ئیرانێ راگەهاند؛ ئەمریکا ب تاکئالییانە ژ رێککەفتنا ئەتۆمی دەرکەفتییە و تەهران بەرهەڤە دەربارەی وێ رێککەفتنێ دگەل واشنتۆنێ دانوستاندنان بکەت.
مەسعوود پزیشکییان، سەرۆکێ نوو یێ ئیرانێ و فۆمیۆ کیشیدا، سەرۆکوەزیرێ ژاپۆنێ ب تێلەفۆنێ ئاخفتن، پزیشکییان راگەهاند؛ ئیران بەرهەڤە دەربارەی رێککەفتنا ئەتۆمی د گەل ئەمریکا دانوستاندان بکەت و گۆت؛ ئەمریکا ب تاکئالییانە ژ رێککەفتنا ئەتۆمی دەرکەفتییە.
سەرۆکێ نووی یێ ئیرانێ دا زانین ژی: گەلێ ئیرانێ ژ ئالییێ ئەمریکا ڤە هاتیە سزادان لێ وەلاتێ وی دەرگەهێ دانوستاندنان هێلایە ڤەکری بۆ دیالۆگێ لسەر وێ پرسێ.
ژ ئالییێ خو ڤە سەرۆکوەزیرێ ژاپۆنێ هیڤی خواست ب زویترین دەم ئیران و ئەمریکا دەربارەی وێ پرسێ بگەهنە رێککەفتنێ و دیار کر: تۆکیۆ بەرهەڤە ئاسانکارییان بۆ ئاسایبوونا پەیوەندییێن د ناڤبەرا وان هەر دو وەلاتان دا بکەت.
