گاڤ

تۆنی کرۆس یاریکەرێ بەرێ یێ ئەلمانی و یانەیا ریال مەدرید لسەر رەخنەگرتنێ ل خۆلا سعوودی بەردەوامە و دبێژیت؛ نابیت یاریکەرەک یێ گەنج بیت و شیانێن یاریکرنێ ل ئەورۆپا هەبن، بچیتە سعوودیێ.

تۆنی کرۆس د نووترین داخویانی دا رادگەهینیت؛ یاریکرن ل سعوودیێ بۆ کریستیانۆ رۆنالدۆی تشتەکێ گونجایە ل دەمەکێ یاریکەر ل دویماهییا کاروانێ خۆ یێ وەرزشی دایە، لێ گەلەک زەحمەتە د وێ چەندێ بگەهی یارییکەرەک ل ناڤەراستا کاروانێ خۆ یێ وەرزشی یە و شیانێن یاریکرنێ ل خۆلێن مەزنێن ئەورۆپا هەنە بچیتە خۆلا سعوودی.

کرۆس ئاماژێ ژی دکەت: هەمی د بێژن هەڤرکی ل خۆلا سعوودیێ هەیە، لێ بابەت تنێ پارەیە ئەڤە ژی دژی تەپاپێ یە.

 ئەڤە نە ئێکەم جارە ستێرا بەرێ یا هەلبژارتییێ ئەلمانیا و یانەیا ریال مەدرید رەخنێ ل خۆلا سعوودی دگریت بەری نوکە ژی گۆتبوو؛ یاریکەرێن گەنج ژ بەر پارەی دچنە سعوودیێ و نەبوونا مافێن مرۆڤی ئەگەرە کو پەیوەندیێ ب ئەوێ خۆلێ نەکەت.