گاڤ – تایبەت

ئێک ژ بریندارێن دی یێن رویدانا شڤێدێ یا دهۆکێ رەوشا وی باش نینە و ئەو ژی گەنجەکێ دەرچوویێ زانکۆیا دهۆکە.

نێچیرڤان عەبدولعەزیز، گەنجەکێ پارێزگەها دهۆکێ یە، دەرچوویێ پشکا جوگرافیێ ل کولیژا زانستێن مرۆڤایەتی یا زانکۆیا دهۆکە. نێچیرڤان بەرپرسێ دانانا سیستەمێ غازێ ل کۆمپانیا مزگین بوویە.

 ل گۆرەی زانیاریێن دەستپێکی، بەری رویدانا پەقینا شڤێدی، کۆمپانیا غازێ پەیوەندی ب نێچیرڤانی کریە و گۆتیێ: ل ئێک ژ ئاڤاهیێن وان سیستەمێ غازێ لێ دانای، غاز ژبەر دچیت.

نێچیرڤان ل وی دەمی ل مالا ئێک ژ هەڤالێن خۆ ل پێش یاریەکا جاما جیهانی بوو، لێ مالا هەڤالێ خۆ بجهـ هێلایە و چوویە داکو وێ لێچوونا غازێ چارە بکەت.

نێچیرڤان گەهشتیە ئاڤاهی، لێ ل دەما ل دەرەجان ب سەر دکەفت، پەقین چێبوویە و ب رێژەیا 95٪ سۆتیە.

هەڤالەکێ نێچیرڤان عەبدولعەزیزی بۆ گاڤ گۆت: نوکە مالباتا وی بزاڤان دکەت ڤیزەیا تورکیا بۆ بدەستڤە بینیت و ئەگەر ب دەست کەفت، ئەڤرۆ پشتی نیڤرۆ دێ بۆ تورکیا هێتە ڤەگوهاستن.