گاڤ – تایبەت 
وەبەرهێنەرەکێ دهۆکێ 3 سکالا ل سەر رێڤەبەرەکێ حکومی تۆمار کرینە و دبێژیت: ئەو رێڤەبەر پۆستێ خۆ یێ حکومی بۆ بەرژەوەندیێن گشتی بکار نائینیت.
وەبەرهێنەر و بازرگانەکێ دهۆکێ بۆ گاڤ گۆت: ئێک ژ رێڤەبەرێن حکومی یێن پارێزگەها دهۆکێ پۆستێ خۆ یێ حکومی بۆ بەرژەوەندیێن گشتی بکار نائینیت و د بەرژەوەندیا هندەک بازرگانان دا و دژی هندەک بازرگانێن دی کار دکەت.
وی وەبەرهێنەری دیار کر: وی پێشتر دەستویری بۆ ئاڤاکرنا تاوەرەکی وەرگرتیە، لێ نوکە و پشتی وی 12 قات ئاڤاکرین، رێ پێ ناهێتە دان تەمام بکەت و ئەو رێڤەبەر دبێژیتێ "رووبەرێ ئەردێ تە ژ سێ هزار متران کێمترە و نابیت ژ 12 قاتان زێدەتر ئاڤا بکەی."
وی وەبەرهێنەری گۆت ژی "تاوەرەکی دی ل دهۆکێ هەیە کو رووبەرێ وی ژی ژ سێ هزار متران کێمترە، لێ تا نوکە پتری 40 قاتان ئاڤاکرینە و بەردەوامە."
هەروەسا گۆت "وی گازندەیا خۆ گەهاندبوو وەزارەتا باژێڕڤانی و گەشتوگۆزارێ، لژنە ژ وەزارەتێ هاتینە دهۆکێ و ساسان عەونی، وەزیرێ باژێڕڤانی و گەشتوگۆزار ب نڤیسار فەرمان دایە وی رێڤەبەرێ حکومی کو رێ بدەت ئەو کارێ خۆ بکەت و تاوەری تەمام بکەت، لێ وی رێڤەبەرێ حکومی دو جاران نڤیسارا وەزیری پشتگوهـ هاڤێتیە."
ئەو وەبەرهێنەر دبێژیت "وی ل  دادگەها دهۆکێ، دەستەیا دەستپاکیا دهۆکێ و هەروەسا جڤاتا وەزیرێن هەرێما کوردستانێ سکالا سەر وی رێڤەبەرێ حکومی تۆمار کریە و ئەو رێڤەبەر ب خراب بکارئینانا پۆستێ خۆ یێ حکومی و پشتگوهخستنا نڤیسارێن وەزاری سووچبار کر."