گاڤ

تنێ پشتی دو رۆژان ژ راگەهاندنا پرۆژەیێ ئازادی ل دەرتەنگا هورمز، دۆنالد ترەمپی ئەو پرۆژە ب مەرەما سەرخستنا پرۆسەیا دانوستاندنان ب دەمکی راگرت.

دۆنالد ترەمپ، سەرۆکێ ئەمریکا د پۆستەکێ دا ل سەر ترۆس سۆشیال نڤیسییە: ل سەر داخوازییا پاکستان و چەند وەلاتێن دی یێن ناڤبەیندکار ئەڤ بریارە هاتییە دان.

هەروەسا نڤیسییە: پێشکەفتنەکا مەزن بەرەڤ رێککەفتنەکا باش و تەمام ب رێڤەیە. ژبەر ڤێ یەکێ مە بریاردا ئەڤ پرۆژەیە بۆ دەمەکێ کورت و دەمکێ بهێتە راگرتن، لێ دۆرپێچا دەریایی ل سەر ئیرانێ دێ یا بەردەوام بیت.

بەری دو رۆژان ترەمپی پرۆژەیێ ئازادی ل دەرتەنگا هورمز راگەهاندبوو، ئارمانجا ڤی پرۆژەیی ئەوبوو کو هێزێن دەریایی یێن ئەمریکا رەخەکێ دەرتەنگێ ب زۆری ڤەکەن، داکو لڤینا سەربازی بهێتەکرن و کەشتییێن وەلاتێن جیهانی تێدا دەربازببن، د رۆژا ئێکێ دا هندەک هێرش هاتنەکرن، ئەمریکا گۆت: مە 6 بەلەمێن ئیرانێ نقوومی ئاڤێ کرن، لێ ئیرانێ ژی رەتکرن چ بەلەمێن وان یێن سەربازی هاتبنە پەقاندن، ئەو بەلەمێن پەقین یێن بازرگانی بوون.