گاڤ

سەرۆک بارزانی پەیامەک ب هەلکەفتا سالا نوی بەلاڤ کر و دوپاتی ل پەیاما ئاشتیخوازیێ و فەرهەنگا پێکڤەژیانێ یا گەلێ کوردستانێ کر.

سەرۆک مەسعوود بارزانی د پەیامەکێ دا سالا نوی ل هەموو خێزانێن شەهیدان، پێشمەرگەیێن قەهرەمان و خەلکێ کوردستانێ و ئیراقێ و جیهانێ پیرۆز کر.

سەرۆک مەسعوود بارزانی د پەیاما خۆ دا دوپاتی ل پەیاما ئاشتیخوازیێ و فەرهەنگا پێکڤەژیانێ یا گەلێ کوردستانێ کر و راگەهاند: گەلێ کوردستانێ هەردەم باوەری ب ئاشتی و براتیێ هەبوویە و خواستیە کێشە ب دانوستاندن و زمانێ لێکتێگەهشتنێ و دویر ژ دەمارگیریێ بهێنە چارەکرن.

سەرۆک بارزانی د پەیاما خۆ دا بەحسا پرۆسەیا سیاسی یا ئیراقێ ژی کریە و دیار کریە: وان باوەری هەیە نوکە دەرفەتەکا نوی بۆ چارەکرنا کێشەیێن د ناڤبەرا هەرێما کوردستانێ و حکومەتا فیدرال دا هەیە و دوپاتی ل وێ یەکێ کریە کو ئەو دێ ب هەموو شیانێن خۆ پشتەڤانیا بجهئینانا وان رێککەفتنان کەن یێن د ناڤبەرا ئالیێن سیاسی یێن ئیراقی و هەروەسا حکومەتا هەرێما کوردستانێ و حکومەتا فیدرال دا هاتینە کرن.

سەرۆک بارزانی خۆیا ژی کریە: ئەو چاڤەڕێبوون هەیە کو ل قووناغێن بهێن دا گاڤێن حکومەتێ و پرۆسەیا سیاسی یا ئیراقێ د چارچووڤەیێ دەستووری و ب ئاراستەیێ بەرژەوەندیێن گەلێن ئیراقێ و ب لبەرچاڤوەرگرتنا پرەنسیپێن هەڤپشکی، هەڤسەنگی و سازانێ دا بن.

د دوماهیا پەیاما خۆ دا سەرۆک بارزانی هیڤی خواستیە سالا نوی سالا خۆشی و بەختەوەریێ بۆ هەموو وەلاتیێن هەرێما کوردستانێ و ئیراقێ بیت و پێکڤەژیان بۆ ڤێ دەڤەرێ و سەرجەم مرۆڤایەتیێ بدەستڤە بهێت.