گاڤ

سەرۆکێ ئەمریکا ڕادگەهینیت؛ شەڕێ وەلاتێ وی ل گەل ئیرانێ دێ ب زویترین دەم و ڕاستەوخۆ پشتی هەلبژارتنێن نیڤا خۆلی کۆتایی هێت. ترەمپی د گۆتارەکێدا ل دەمێ بانگەشەیا هەلبژارتنان ئاماژە ب هەڕفینا تەمام یا شیانێن سەربازی و ئابۆری یێن تەهرانێ کر و هۆشداری دا کو پشتی ب دویماهیهاتینا ڤێ ململانێیێ، بهایێ پەترۆلێ ل بازاڕێن جیهانێدا دێ بلەز هێتە خوار.

ئەڤ داخویانییێن گەرم د دەمەکیدا دهێن کو هەر نوکە ل دەستپێکا هەیڤا چریا ئێکێ سالا 2026ێ، ئۆپەراسیۆنێن لەشکری یێن ئەمریکا د چارچۆڤەیێ شەڕێ دگەل ئیرانێدا چووینە د هەیڤا حەفتێ دا، و ئۆپەراسیۆنێن فڕۆکەیێن بێفڕۆکەڤان و مۆشەکی د دەرتەنگا هورمز دا د بەردەوامن. دیسان ئەڤە د دەمەکی دایە کو بەرپرسێن بلند یێن ئاسایشا نیشتمانی د ئیدارەیا ترەمپیدا ب سەرۆکایەتییا جەی دی ڤانس ل کەمپ دەیڤد کۆمبووینە دا کو پلانێن داهاتی یێن شەڕی دژی تەهرانێ و حۆسییان ل یەمەنێ داڕێژن.

ترەمپی د گۆتارا خۆدا ئاشکرا کر؛ ئیرانێ نوکە نە هێزا دەریایی مایە، نە هێزا ئاسمانی، نە ڕادار و نە ژی سیستەمێ بەڕەڤانییا دژی فڕۆکەیان، و ئابۆرێ وێ ب تەمامی هاتییە هەڕفاندن کو ڕێژەیا هەلاوسانێ تێدا گەهشتییە نێزیکی 310%ێ. ناڤبری تەهران ب "زۆردارا رۆژهەلاتا ناڤین" وەسفکر و ڕەخنە ل سەرۆکێن پێشتر گرتن چونکی پێدڤی بوو ژ مێژە ئەڤ کارە کربا، دیسان ئاماژە ب سەرگەردانییا دەسەلاتێ ل تەهرانێ کر و گۆت: "ئەوان سەرکردەیێن خۆ ژ دەست دان، تەنانەت دەما هەڤرکی بۆ دیارکرنا سەرۆکی هاتییەکرن کەس بەرهەڤ نەبوو پشکدارییێ بکەت؛ نوکە کەس ل وێدەرێ نینە ئەم گۆتوبێژان ل گەل بکەین، ل دەرگەهی ددەین لێ کەس ل مال نینە.

ل دۆر پێشڤەچوونێن لەشکری ژی، سەرۆکێ ئەمریکا دیارکر کو د دەما پتر ژ شەش هەیڤێن بۆریدا ب تنێ 18 سەربازێن وان یێن قارەمان گیانێ خۆ ژ دەست دایە، و سۆزا وی بۆ ڕێگریکرنێ ژ گەهشتنا ئیرانێ ب چەکێ ئەتۆمی ب تەمامی بجهئینایە، دەما کو فڕۆکەیێن بۆمبهاڤێژ یێن جۆرێ B-2 ل دەمژمێر 1:00ێ شەڤێ چووینە د کویراتییا 3 هزار پێیان د بن ئەردیدا و تەڤایا شیانێن ئەتۆمی یێن وان تێکشکاندین، لەورا ئیران بۆ چەندین سالان نەشێت ڤان وێرانکارییان دوبارە ئاڤا کەتەڤە. ترەمپی د دویماهییا پەیاما خۆدا بەرگری ژ گرانبوونا دەمی یا بهایێ سۆتەمەنییێ ل ئەمریکا کر و هۆشداری دا دەنگدەران کو ئەڤ باجە گەلەک یا کێمە ل هەمبەر مەترسییا ب دەستڤەئینانا چەکێ ئەتۆمی ژ لایێ کەتوارێن توندڕەو ڤە.