گاڤ

پێگەهێ "ئەکسیۆس" یێ ئەمریکی ڕادگەهینیت؛ بەرپرسێن بلند یێن ئاسایشا نیشتمانی د ئیدارەیا دۆنالد ترەمپیدا، ب سەرۆکایەتییا جەی دی ڤانس ل هاڤینەگەها کەمپ دەیڤد کۆمبوونن دا کو گەنگەشێ ل سەر گاڤێن داهاتی د جەنگێ ئیرانێ و ململانێیا یەمەنێدا بکەن، د هەمان دەمدا تەکەزێ ل سەر هندێ دکەت کو د ڤێ کۆمبوونێدا بڕیارێن ئێکلاکەر ل سەر پلانێن سەربازی هاتینەدان.

ئەڤ کۆمبوونا نهێنی و هەستیار د دەمەکیدا دهێت کو پێشتر سەرۆکێ ئەمریکا دۆنالد ترەمپ هۆشدارییەکا توند دابوو تەهرانێ و ڕاگەهاندبوو؛ یان دڤێت ئیران ڕێککەفتنەکێ ئیمزا بکەت، یان ژی چو بوونا وێ د داهاتی دا نامینیت.

پێگەهێ ئەمریکی ئاشکرا کر؛ د ناڤ تەوەرێن ڤێ کۆمبوونێدا، ب هویری گەنگەشە ل سەر فشارێن سعوودیێ هاتییەکرن ب مەرەما ئەنجامدانا هێرشێن ئاسمانی یێن هەڤپشک دژی حوسییان ل یەمەنێ، ئەڤە ژی بەری دەستپێکرنا ئۆپەراسیۆنەکا لەشکری یا مەزن د دەریایا سۆر دا بۆ پاراستنا ڕێڕەوێن ناڤدەوڵەتی یێن بازرگانییێ.

ناڤبری ئاماژە ب وێ چەندێ ژی کر کو ئیدارەیا ترەمپی د نوکە دا کار بۆ داڕشتنا قویناغەکا نوی یا گەف و فشارێن سەربازی دکەت دا کو پێگەهێ ئیرانێ د دەڤەرێدا کێم بکەت.

ئەڤ پێشهاتێن سەربازی د دەمەکیدانە کو د چەند ڕۆژێن بۆریدا هێزێن ئەمریکا (سێنتکۆم) د بەرامبەر بزاڤێن چاندنا مینێن دەریایی د دەرتەنگا هورمز دا چەندین بنکەیێن سوپایێ پاسداران ل دەڤەرێن سنۆری و گزیرتەیا قشم ئارمانجکربوون. ژ لایێ خۆ ڤە ژی، پەیڤدارێ سوپایێ ئیرانێ محەمەد ئەکرەمینییا و رێبەرێ بلند یێ ئیرانێ موجتەبا خامنەیی هۆشداری دابوون کو دێ بەرسڤەکا بلەز، وێرانکەر و بەرفرەهـ دەنە ئەمریکا، لەورا ئەڤ کۆمبوونا کەمپ دەیڤد وەک بەرهەڤییەکا بلەز یا واشنتۆنێ دهێتە دیتن بۆ بەرەنگاربوونا هەر بەرسڤدانەکا لەشکری یا تەهرانێ کو ببیتە ئەگەرێ پەککەفتنا ئاسایشا دەڤەرێ.