مامێ مەکگۆرک چ ژ کوردان دڤێت؟
رزگار حەمید شەریف
ماستەر ب زانستێن سیاسی، زانینگەها NTNU
برێت مەکگۆرک رێکخەرێ دوسیهيا رۆژهەلاتا ناڤین و باکۆرێ ئەفریقيا د ئیدارەیا بایدن دا و ئیسماعیل قائانی بەرپرسێ فەیلەقا قودس ل رۆژا 17/1/2023 د ئێک دەمدا گەهشتنە ئێراقێ. تیما ل گهل مەکگۆرک ل گەل بەرپرسێن ئيراقێ و کوردستانێ جڤیان و یا بالکێش ل گەل مەکگۆرک رێکخەرا سەرۆکێ ئەمریکا بۆ ئاسایشا ئێنرژیێ ژی هاتبوو.
سەرهدانا ڤان دو کەسێن گرنگ ل ئیدارهیا بایدن بۆ ناوچەیێ د دەمەکێ دایە کو ئەمریکا و ئیران نەگەهشتينە چ رێککەفتنێن ئەتۆمی و شەرێ ئۆکرانیا بەردەوامە و پشتی بڕینا غازا روسی بۆ ئەورۆپا چاڤێ هەمیان ل هەرێما کوردستان و ئيراقێ یە. سزایێن ئیدارەیا ئهمريكى ل سەر ئیرانێ د بەردەوامن و دێ زێدەتر بن. ئەمریکا دخوازيت کو کوردستانێ رۆلەکێ مەزن د ڤێ بۆشاتیا ئێنرژیێ دا هەبیت و هاریکاریا ئەورۆپا بکەت.
ئیران ژی هەر ل دەستپێکا شەڕی بڕیار دایە هاریکاریا رۆسیا بکەت ب فرۆتنا درۆنان و هەمی بزاڤهكێ دێ كهت ئيراق و ب تایبەت کوردستان ئێنرژیا خۆ نەهنێرنە ئەورۆپا. د ڤێ رهوشێ دا، ئەم کورد دڤێت چاڤەرێی زێدەتر هێرشێن درۆنان ل سەر کێلگەهێن بەرهەمهێنانا ئێنرژيێ ل کوردستانێ ژ لايێ مێلیشیاتێن سەر ب ئیرانێ ڤه و بکارئینانا دادگەها فیدرال بۆ رێگرتنێ ل فرۆشتنا پەترۆلێ و غازێ ببن.
هاتنا بێنیامین نەتەنیاهۆ بۆ سەر دەستهەلاتێ ل ئیسرائیلێ ژى ئاماژە ب وێ چەندێ ددهت کو دێ گرژیێن دگەل ئیرانێ زێدەتر بن و ئەڤێ ژی وێ کارتێکرنەک خراب ل سەر رەوشا هەرێما کوردستانێ هەبيت.
ئەمریکا هەروەسا دێ بزاڤێ كهت رێکێ ل هێرشا تورکیا بۆ سەر رۆژئاڤایێ کوردستانێ بگريت ژبەرکو مەکگۆرک د ئیدارەیا ترامپ دا هەر ل سەر وێ هێرشا ل سەر عەفرینێ وەک نەرازیەک دەستژکارکێشا بوو، ژ بۆ ڤێ چەندێ ژی مەکگۆرک دیسان وێ داخواز ژ یەپەگە بکەت دەستێ خۆ ژ پ ک ک و هەلگرتنا سلۆگان و هێمایێن وان بەردن و بەهانەیێ نەدەنە دەست تورکیا. مژارەک دی یا تیما مەکگۆرک ئێکگرتنا ناڤماليا کوردان و ئێکگرتنا پێشمەرگەیە ژ بەر دو ئەگەران: ئێک؛ شەڕێ دژی داعشە و یا دویێ ئیران وێ ڤێ ناکۆکیا ناڤمالا کوردان بۆ لێدانا بەرژهوندیێن ئەمریکا بکاربینيت.