بهایێ زه‌یتا زه‌یتوونان دێ گران بیت

بەلاڤ بکە

 

گاڤ

دهێته‌ چاڤه‌رێكرن بهایێ زه‌یتا زه‌یتوونان ل سه‌ر ئاستێ جیهانێ د ده‌مێ بهێت دا گڕان ببیت.
ئسپانیا رێژه‌یا 40% ژ به‌رهه‌مێ زه‌یتا زه‌یتوونان ل سه‌رانسه‌رى جیهانێ دابین دكه‌ت و ژ به‌ر هشكه‌سالیا ئه‌ڤ ساله‌ ل وى وه‌لاتى، پێشبینى دهێنه‌ كرن به‌رهه‌مئینانا وێ كێم ببیت و بهایێ وێ ل سه‌رانسه‌رى جیهانێ بلند ببیت.
ده‌سته‌یا به‌رهه‌مهێنه‌رێن زه‌یتا زه‌یتوونان ل ئسپانیا ئه‌ڤرۆ ئه‌ینیێ راگه‌هاند؛ به‌رهه‌مێ زه‌یتا زه‌یتوونان ل جیهانێ ژ به‌ر هشكه‌سالیێ ل ئسپانیا ب رێژه‌یا نه‌كێمتر ژ 10% دێ كێم بیت و ئه‌ڤ چه‌نده‌ دێ بیته‌ ئه‌گه‌رێ بلندبوونا بهایێ وێ.
ئسپانیا وه‌لاتێ ئێكێ یه‌ ل سه‌ر ئاستێ جیهانێ د به‌رهه‌مئینانا زه‌یتا زه‌یتوونان دا و هه‌لسه‌نگاندنێن كۆمیسیۆنا ئه‌ورۆپى پێشبینى كرینه‌ كو به‌رهه‌مئینانا وێ ل ئسپانیا ب هه‌ڤبه‌ركرن ل گه‌ل سالا بۆرى دێ هندى نیڤێ بیت.
هه‌روه‌سا به‌رهه‌مئینانا زه‌یتا زه‌یتوونان ل ئیتالیا و پۆرتۆگال ژى، وه‌لاتێن دوێ و چارێ ل سه‌ر ئاستێ جیهانێ بۆ به‌رهه‌مئینانا وێ، ژ به‌ر پێلێن گه‌رمیێ د وه‌رزێ گه‌شه‌كرنا دارێن زه‌یتوونان دا و هشكه‌سالیا ژ هاڤینا بۆرى تا نوكه‌ كێمبوویه‌.
دهێته‌ چاڤه‌رێكرن وه‌لاتێ یونانێ كو نه‌كه‌فتیه‌ د بن كارتێكرنا ڤێ هشكه‌سالیێ دا و ل رێزا سیێ ل سه‌ر ئاستێ جیهانێ بۆ به‌رهه‌مئینانا زه‌یتا زه‌یتوونان دهێت، تا رادده‌یه‌كێ قه‌ره‌بوویا كێمیا به‌رهه‌مى بكه‌ت، هه‌رچه‌نده‌ نه‌شێت ب ته‌مامى بكه‌ت.
 

More About

Related