وهتسئهپ دێ ساخلهتێ گوهۆڕینا نامهیان پشتى ڤرێكرنێ بهردهست كهت
گاڤ
ئهپلیكهیشنێ وهتسئهپى یێ كۆمپانیا مێتا دێ ساخلهتێ گوهۆڕینا نامهیان پشتى ڤرێكرنێ بۆ كهسهكێ دى بهردهست كهت.
ژمارهیهكا بكارهینهران پشتى ڤرێكرنا نامهیان حهز دكهن گوهۆڕینێن رێنڤیسێ، رێزمانێ یان گوهۆڕینا هندهك پهیڤێن نهگونجاى د ناڤهرۆكا نامهیان دا بكهن، لێ تا نوكه پشتى ڤرێكرنا نامهیان بكارهینهر نهدشیان چ گوهۆڕینان تێدا بكهن.
ئهكاونتێ فهرمى یێ وهتسئهپى د تۆڕا تویتهرى دا بهلاڤكریه كو ل نزیك دێ ساخلهتێ گوهۆڕینا نامهیان بهردهست بیت.
وهتسئهپى ڤیدیۆیهك تویت كریه و تێدا زێدهكرنا ساخلهتێ نوى دیاركریه.
"وهتسئهپى دهست ب تێستكرنا ڤى ساخلهتى نوى ل سهر موبایلێن ئهندرۆید كریه و دهێته چاڤهرێكرن ل دهمهكێ نزیك بۆ موبایلێن IOS و ئهندرۆید بهردهست ببیت"، ل گۆرهى مالپهرێن تهكنیكى.
پشتى ڤرێكرنا نامهیێ، دێ ئوپشنهك بۆ بكارهینهرى ب ناڤێ Edit بهردهست بیت و تێدا دێ شێت گوهۆڕینێ د نامهیا وى ڤرێكرى دا بكهت.
ل گۆرهى راپۆرتان، ئهڤ ساخلهته پشتى 15 خۆلهكان ژ ڤرێكرنا نامهیێ دێ ل كار بیت و بكارهینهر پشتى وى دهمى نهشێت گوهۆڕینێ د نامهیا هاتیه ڤرێكرن دا بكهت.
وهتسئهپى ژ بهرى نوكه ئوپشنێ ژێبرنا نامهیان پشتى ڤرێكرنێ بهردهست كربوو لێ هندهك كهسان نهڤێن نامهیان ژێببهن چونكى دهستهواژهیا ’نامه هاته ژێبرن’ بۆ كهسێ بهرانبهر دیار دبیت، لهوا ساخلهتێ نوى دێ بیته جهێ مفاى بۆ بكارهینهران.