ئیران مووشه‌كه‌كا بالیستى یا نوى تێست دكه‌ت و ئه‌مریكا و فره‌نسا نیگه‌رانن

بەلاڤ بکە

 

گاڤ

ئیرانێ ئه‌ڤرۆ ئه‌ینیێ مووشه‌كه‌كا بالیستى یا نوى ژ جۆرێ خه‌یبه‌ر یا مه‌ودایێ وێ 2 هزار كیلۆمه‌تر تاقیكر و ئه‌مریكا و فره‌نسا نیگه‌رانیا خۆ ژ ڤێ چه‌ندێ ده‌ربڕین.

ئالاڤێن میدیایێ یێن ئیرانى به‌لاڤكرینه‌ "ڤێرژنێ پێشكه‌فتى ژ مووشه‌كا بالیستى خرمشه‌هر 4 یا مه‌ودایێ وێ 2000 كیلۆمه‌تر ب ناڤێ خه‌یبه‌ر ب سه‌ركه‌فتیانه‌ هاته‌ تێستكرن و دشێت سه‌ره‌كێ جه‌نگى ب گڕانیا 1500 كیلۆگرامان بهه‌لگریت".

فره‌نسا ئه‌ڤ چه‌نده‌ ب سه‌رپێچیا بڕیارا جڤاتا ئاسایشێ یا نێڤده‌وله‌تى ئه‌وا كو رێككه‌فتنا ناڤۆكى ل گه‌ل ئیرانێ د سالا 2015 دا په‌سه‌ندكرى لقه‌له‌مدا.

بڕیارا 2231 یا جڤاتا ئاسایشێ یا نێڤده‌وله‌تى ل سه‌ر ئیرانێ سه‌پاندیه‌ كو هه‌ر چالاكیه‌كا گرێداى مووشه‌كێن بالیستى یێن دشێن چه‌كێن ناڤۆكى بهه‌لگرن، براوه‌ستینیت.

وه‌زاره‌تا ده‌رڤه‌ یا فره‌نسا ئاماژه‌ ب وێ چه‌ندێ ژى كریه‌ كو "ئه‌ڤ چالاكیێن هه‌نێ جهێ مه‌ترسیێ نه‌ ل ده‌مه‌كێ به‌رفره‌هكرنا به‌رنامه‌یێ ناڤۆكى یێ ئیرانێ به‌رده‌وامه‌".

ژ لایێ خۆڤه‌، ماتیۆ میله‌ر په‌یڤدارێ ب ناڤێ وه‌زاره‌تا ده‌رڤه‌ یا ئه‌مریكا دبێژیت "پێشڤه‌برنا ئیرانێ بۆ مووشه‌كێن بالیستى گه‌فه‌ ل سه‌ر ئێمناهیا هه‌رێمایه‌تى و جیهانى".

رێككه‌فتنا ناڤۆكى 5+1 یا سالا 2015، چالاكیێن ناڤۆكى یێن ئیرانێ ب شێوه‌یه‌كێ به‌رفره‌هـ سنووردار كرینه‌.

More About