سوبههى دێ پرۆسێسا وهرگرتنا گهنمێ جۆتیاران دهستپێكهت
گاڤ
پرۆسێسا وهرگرتن و كڕینا گهنمێ جۆتیاران ل ههرێما كوردستانێ سوبههى شهمبیێ دێ دهستپێكهت.
پهیامنێرێ گاڤ ل ههولێرێ دیاركر؛ سوبههى ل دهمژمێر 10ى سپێدێ ل سایلۆیا ههولێرێ دێ ئێكهم بارێ گهنمێ جۆتیاران هێته وهرگرتن.
خۆیا ژى كر كو رێورهسم دێ ب ئامادهبوونا وهزیرێ بازرگانى یێ ههرێما كوردستانێ و رێڤهبهرێ گشتى یێ بازرگانى ل وهزارهتا بازرگانیا ئیراقێ برێڤهچیت.
وهزارهتا بازرگانیا ههرێمێ بهرى نوكه راگههاند بوو كو ئهو دێ ههر تهنهكا گهنمى ب 850 هزار دیناران ژ جۆتیاران كڕن و جۆتیار د دهمێ دو حهفتیان دا ژ رادهستكرنا گهنمى دێ شایستهیێن خۆ وهرگرن.
وهزارهتێ پێشبینى ژى كربوو كو ئهڤ ساله ژ بهر زێدهبوونا بارانان، بهرههمهكێ باش یێ گهنمى ژ جۆتیاران بگههیت.
ههروهسا وهزارهتا بازرگانى یا ئیراقێ ژى راگههاند بوو كو ههر تهنهكا گهنمى د ڤى وهرزى دا دێ ب 850 هزار دیناران ژ جۆتیاران هێته كڕین و جۆتیار د دهمێ دو حهفتیان دا ژ رادهستكرنا گهنمى دێ شایستهیێن خۆ وهرگرن.
ههڤدهم وهزارهتا چاندن و ژێدهرێن ئاڤێ یا ههرێما كوردستانێ دوهى پێنجشهمبیێ راگههاند بوو كو وهزارهتا چاندنێ یا ئیراقێ بۆ ئهڤ ساله دێ 375 هزار تهنێن گهنمى ژ جۆتیارێن ههرێما كوردستانێ وهرگریت.
شاندهكێ وهزارهتا بازرگانى یا ئیراقێ ل ههیڤا نیسانێ یا بۆرى سهرهدانا ههرێما كوردستانێ ژ بۆ بهحسكرنا ڤهكرنا سایلۆیێن نوى ل ههرێمێ بۆ وهرگرتنا گهنمێ جۆتیاران كربوو.
ژڤان بوو ل رۆژا چارشهمبیا بۆرى پرۆسێسا وهرگرتنا گهنمێ جۆتیاران دهسپێبكهت لێ ژ بهر كێشهیهكا تهكنیكى بۆ سوبههى شهمبیێ هاتبوو پاشئێخستن.
وهزارهتا بازرگانى و پیشهسازى یا حكومهتا ههرێمێ چارشهمبیێ راگههاند بوو كو ژ بهر كێشهیهكا تهكنیكى و نهگههشتنا سی دى CD ژ وهزارهتا بازرگانى یا ئیراقێ بۆ سایلۆیێن ههلگرتنا گهنمى ل ههرێما كوردستانێ، بڕیارا پاشئێخستنا پرۆسێسا وهرگرتنا گهنمى ژ جۆتیاران بۆ شهمبیێ 27/5/2023 هاته دان.