رازیبوون ل سه‌ر بكارئینانا ده‌رمانه‌كێ نه‌خۆشیا شه‌كرێ بۆ كێمكرنا كێشا له‌شى هاته دان
بەلاڤ بکە
گاڤ
ده‌ستهه‌لاتێن ساخله‌میێ یێن ئه‌مریكى رازیبوون ل سه‌ر بكارئینانا ده‌رمانه‌كێ نه‌خۆشیا شه‌كرێ بۆ كێمكرنا كێشا له‌شى دان كو دشێت چارێكه‌كا كێشا له‌شێ مرۆڤى كێم بكه‌ت.
زانایێن ئه‌مریكى راگه‌هاندن كو ڤێرژنه‌كێ نوى ژ ده‌رمانه‌كێ ناڤدار بۆ چاره‌سه‌ریا نه‌خۆشیا شه‌كرێ د شیان دایه وه‌ك ده‌رمانه‌ك بۆ كێمكرنا كێشا له‌شى بهێته فرۆشتن.
كارگێریا خوارن و ده‌رمانان یا ئه‌مریكى رازیبوون ل سه‌ر بكارئینانا ده‌رمانێ تیرزه‌پتاید tirzepatide بۆ كێمكرنا كێشا له‌شى دایه.
ئه‌و ده‌رمانه ژ به‌رهه‌مێ كۆمپانیا Eli Lilly یا ده‌رمانایه و د تاقیكرنان دا ئاشكرا بوویه كو ئه‌و ده‌رمانه بوویه ئه‌گه‌رێ كێمبوونا چارێكه‌كێ ژ كێشا له‌شێ مرۆڤى، یان ژى 27 كیلۆگرامان ل گۆره‌ى لێكۆلینه‌كا نوى.
تیرزه‌پتاید tirzepatide نویترین ده‌رمانێ نه‌خۆشیا شه‌كرێ یه كو رازیبوون ل سه‌ر هاتیه كرن ژ بۆ بكارئینانێ بۆ كێمكرنا كێشا له‌شى.
FDA ل سه‌ر بكارئینانا وى ده‌رمانێ ژ لایێ وان كه‌سان ڤه رازیبوو یێن كێشا له‌شێ وان گه‌له‌ك یا بلند و رێژه‌یا بارسته‌یێ له‌شێ وان 30 یان پتر، یان ژى وان كه‌سێن كێشا له‌شێ وان ژ به‌ر حاله‌ته‌كێ ساخله‌میێ بلنده وه‌كى بلندبوونا فشارا خوینێ، زێده‌بوونا كولیسترۆلێ یان نه‌خۆشیا شه‌كرێ.
FDA دیار ژى كریه كو پێدڤیه ل گه‌ل بكارئینانا ڤى ده‌رمانى، مرۆڤ په‌نایێ بۆ سیسته‌مه‌كێ خوارنێ یێ ساخله‌م و ئه‌نجامدانا وه‌رزشێ ژى ببه‌ت.
نه‌كێمتر ژ 100 ملیۆن كه‌سێن پێگه‌هشتى و نزیكى 15 ملیۆن زارۆكان ل ئه‌مریكا ژ بلندبوونا كێشا له‌شى یا دژوار دنالن.
