گاڤ

ئێكه‌تیا ئه‌ورۆپى یا ته‌پاپێى یانه‌یا پاریس سان جێرمان و پێنج یانه‌یێن دى ب سزایێن دارایى یێن جودا جودا سزادان.

یوێفایێ یانه‌یا پاریس سان جێرمان ب كۆژمه‌یێ 98 هزار یۆرۆیان ژ به‌ر هه‌لكرنا جه‌ماوه‌رێ بۆ یاریێن ئاگرى، چوونا جه‌ماوه‌رى بۆ دناڤ یاریگه‌هێ دا و گرتنا رێكێن گشتى د یاریا وێ ل گه‌ل ئه‌ى سى میلان د چامپیۆنز لیگێ دا سزادا.

هه‌روه‌سا یانه‌یا ئایندهۆڤن یا هۆله‌ندى ب 25 هزار یۆرۆیان ژ به‌ر هه‌لكرنا جه‌ماوه‌رێ بۆ یاریێن ئاگرى و هاڤێتنا تشتان بۆ دناڤ یاریگه‌هێ دا هاته‌ سزادان.

هه‌روه‌سا ئه‌نتوێرپ یا به‌لجیكى ب 20 هزار یۆرۆیان ژ به‌ر كریارێن جه‌ماوه‌رێ وێ د یاریا ل گه‌ل پۆرتۆ دا هاته‌ سزادان و یانه‌یا جێنك یا به‌لجیكى ژى ب هه‌مان كۆژمه‌ى ژ به‌ر هه‌لكرنا یاریێن ئاگرى هاته‌ سزادان.

هه‌ڤده‌م یانه‌یا ئولۆمپیاكۆس یا یۆنانى ب كۆژمه‌یێ 21 هزار یۆرۆیان ژ به‌ر ئاخفتنێن ره‌گه‌زپه‌رستانه‌ یێن جه‌ماوه‌رێ وێ هه‌روه‌سا ره‌فتارێن نه‌گونجاى یێن یاریكه‌رێن وێ د یاریا ل گه‌ل وێست هام د خۆلا ئه‌ورۆپى دا هاته‌ سزادان.

یانه‌یا سلاڤیا پراگ یا چیكى ژى ب 20 هزار یۆرۆیان ژ به‌ر كارێن ئاژاوه‌گێرى یێن جه‌ماوه‌رێ وێ، هه‌لكرنا یاریێن ئاگرى و هاڤێتنا تشتان بۆ دناڤ یاریگه‌هێ دا د یاریا ل گه‌ل رۆما د خۆلا ئه‌ورۆپى دا هاته‌ سزادان.