گاڤ

راهێنه‌رێ یانه‌یا بایرن میونشن دیاركر كو هاتنا كیلیان ئێمباپێ بۆ دناڤ رێزێن یانه‌یێ دا دێ بیته‌ جهێ دلخۆشیا وى و دێ یێ به‌رهه‌ڤ بیت ئه‌و ب خۆ بچیته‌ پاریس و ئێمباپێ ل گه‌ل خۆ بینیته‌ ئه‌لمانیا.

دهێته‌ چاڤه‌رێكرن كیلیان ئێمباپێ ل گه‌ل ب دویماهیك هاتنا ڤى وه‌رزى 2023-2024 رێزێن پاریس سان جێرمان بهێلیت و د گرێبه‌سته‌كا ئازاد دا بچیته‌ دناڤ رێزێن یانه‌یه‌كا دى دا كو تا نوكه‌ گرێبه‌سته‌كا نوى ل گه‌ل PSG ئیمزا نه‌كریه‌.

راهێنه‌رێ بایرن میونشن به‌حس ل حه‌زا خۆ بۆ ڤه‌گوهاستنا ئێمباپێ بۆ دناڤ رێزێن یانه‌یا باڤارى دا كر.

تۆماس تۆخێل بۆ كه‌نال پله‌س یێ فره‌نسى گۆت "ئێمباپێ دێ یاریێ بۆ مه‌ كه‌ت، ئه‌ز یێ به‌رهه‌ڤم وى رازى بكه‌م ل شوینا یاریێ بۆ ریال مه‌درید بكه‌ت، بهێته‌ ئه‌لیانز ئه‌رێنا و یاریێ بۆ مه‌ بكه‌ت".

تۆخێل كو راهێنه‌رێ به‌رێ یێ پاریس سان جێرمان بوو زێده‌تر ژى دبێژیت "ئێمباپێ یێ ژیره‌، د به‌رێ دا په‌یوه‌ندیا مه‌ یا باش بوو، ئه‌گه‌ر وى بڤێت بهێته‌ د یانه‌یێ دا، ئه‌ز ب خۆ دێ چم وى ئینم".

نزیكترین یانه‌ بۆ ڤه‌گوهاستنا ئێمباپێ ریال مه‌درید بوو، به‌رى تۆڕا كادێنا سێر د نووچه‌یه‌كێ نه‌چاڤه‌رێكرى دا دیاركرى كو ریال مه‌درید ده‌ستبه‌ردارى هزرا ڤه‌گوهاستنا ئێمباپێ بوویه‌.