گاڤ

ده‌رمانه‌كێ تایبه‌ت ب كێمكرنا كێشا له‌شى مه‌ترسیا مرنێ ب نه‌خۆشیێن دلى و بۆریێن خوینێ ب رێژه‌یا 18% كێم دكه‌ت.

كۆمپانیه‌كا دانیماركى تاقیكرنان ل سه‌ر ده‌رمانه‌كێ نوى یێ كێمكرنا كێشا له‌شى ب ناڤێ Wegovy دكه‌ت، د تاقیكرنان دا ئه‌نجامه‌كێ نوى دیاربوویه‌ ئه‌و ژى ئه‌و ده‌رمانه‌ مه‌ترسیا مرنێ ب نه‌خۆشیێن دلى و بۆریێن خوینێ ب رێژه‌یا 18% كێم دكه‌ت.

فاینانشیال تایمز به‌لاڤكریه‌ "ده‌رمانێ Wegovy كو ژ به‌رهه‌مئینانا كۆمپانیا نوڤۆ نۆردیسكه‌ كو دیاربوویه‌ ئه‌و كێشا له‌شى دئینیته‌ خوار، هه‌روه‌سا ئه‌و ده‌رمانه‌ بوویه‌ ئه‌گه‌رێ كێمبوونا مه‌ترسیا مرنێ وه‌كى د سامپلێن لێكۆلینێ دا دیاربووى".

مارتن هۆلست لانگ جێگرێ سه‌رۆكێ بجهئینانێ یێ پێشڤه‌برنێ د كۆمپانیا نوڤۆ نۆردیسك دا دبێژیت "داتایێن نوى دیار دكه‌ن كا ده‌رمان چه‌ند یێ ب هێزه‌ د چاره‌كرنا مه‌ترسیێن نه‌خۆشیێن دلى و بۆریێن خوینێ دا".

تاقيكرنێن ل سه‌ر ده‌رمانێ Wegovy ل سه‌ر پتر ژ 17600 كه‌سێن ژیێ وان د سه‌ر 45 سالیێ دا و كێشا له‌شێ وان یا بلند و نه‌خۆشیێن دلى و بۆریێن خوینێ هه‌ین لێ نه‌خۆشیا شه‌كرێ نه‌یى هاتبوو كرن.

ل گۆره‌ى ئه‌نجامێن تاقیكرنێ، وى ده‌رمانى مه‌ترسیا مرنێ ژ به‌ر نه‌خۆشیێن دلى و بۆریێن خوینێ ب رێژه‌یا 18% كێمكریه‌، ل هه‌یڤا ته‌باخا بۆرى ژى، ژ به‌ر داتایێن تاقیكرنێن ل سه‌ر ده‌رمانێن نوڤۆ نۆردیسك، بهایێ پشكێن وێ كۆمپانیێ ب رێژه‌یا 16% بلند ببوون.