جگارێ بهێله نه چ شۆله
بەلاڤ بکە
گاڤ
گه‌له‌ك مرۆڤان بزاڤا هێلانا جگارێ كریه، لێ شكه‌ستن ئینایه و جاره‌كا دى كێشایه، شاره‌زایان هنده‌ك رێك داناینه كو مرۆڤ ب وان رێكان جگارێ بهێلیت، ئه‌گه‌ر ته ژى هنده‌ك رێك هه‌بن بزاڤان بكه وان ل سه‌ر خۆ بجهـ بینه و جگارێ بهێله نه چ شۆله.
شاره‌زا دبێژن، چاره‌سه‌رى ب رێكا پێگوهۆڕێن نیكۆتینێ كو ژ علك، به‌خاخێن دفنێ و هه‌ر تشته‌كێ دى یێ جهێ نیكۆتینێ د گریت وه‌ك ژبیركرنا جگارێ بكاربینه، جگارێن ئه‌لكترۆنى ب چوو ره‌نگان نابنه پێگوهۆڕ بۆ هێلانا جگارێ به‌لكو ئالاڤه‌كه تو جگارێ كێم بكه‌یى یان ژى نه‌كێشى، لێ دێ فێرى وێ بى و زیانێن وێ ژى گه‌له‌كن.
هه‌روه‌سا دیاركریه، خۆ دوور بكه ژ جهێن جگاركیشانێ ب تایبه‌ت چایخانه و كافیان، بزاڤان نه‌كه هه‌ر د هزرا جگارێ دا بى و بزاڤان بكه هه‌رده‌م كێشانا وێ پاش بێخه، خۆ ب تشته‌كێ دى ڤه مژوول بكه و ئاشكراكریه، هنده‌ك جاران هه‌ره جهێن جگاره لێ قه‌ده‌غه و بۆ ده‌ما ده‌مژمێره‌كێ یان پتر ل وى جهى ب مینه و خۆ مژویل بكه ئه‌گه‌ر ته كار ژى نه‌بیت.
شاره‌زا دبێژن، بزاڤان بكه علكێ بێ شه‌كر بخۆ، یان ژى چه‌ره‌زى بخۆ و گه‌له‌ك ئاڤێ ڤه‌خۆ، بلا كێشانا جگاره‌یه‌كی ل سه‌ر ته گران راوه‌ستیت و هه‌رده‌م تو هه‌مبه‌رى خۆ راوه‌ستى جگاره‌یه‌ك دێ زیانه‌كا مه‌زن ب من گه‌هینیت باشتره وێ ژى نه‌كێشم و هێدى هێدى وى هه‌ستى ل ده‌ف خۆ په‌یدا بكه كو یا خرابه و دێ زیانان گه‌هینیته ساخله‌میا ته.
وه‌رزش ژى ب ئێك ژ چاره‌سه‌ریێن هه‌ره باش بۆ هێلانا جگاره‌یان دیاركریه و ئاشكراكریه، ئه‌گه‌ر تو وه‌رزشا رێكخستى ژى نه‌كه‌یى هنده‌ك جاران بزاڤان بكه پیاسه‌كا بله‌ز بكه، یان ب سه‌ر ده‌رجان ب كه‌ڤه یان ژى بكه غار یان د حه‌فتیێ دا دو سێ رۆژا بدانه بچیه مه‌له‌ڤانیان، ل وى ده‌مى دێ سینگێ ته ڤه‌ببیت و دێ بیته ئه‌گه‌ر ده‌مه‌كى دریژ پشتى وێ وه‌رزشا سڤك جگارێ نه‌كێشى.
شاره‌زایان هنده‌ك رێكێن دى ژى دیاركرینه كو یین هه‌ناسێ نه بزاڤان بكه هنده‌ك جاران هه‌ناسه‌یێن كویر ب رێكا دفنێ ب كێشه و هه‌ناسه‌یا خۆ ب گره بۆ ده‌ما خۆله‌كه‌كێ و زێده‌تر و پاشى ب ده‌ڤى وى بایى ژ سینگێ خۆ ده‌ربێخه و ڤێ یه‌كێ پێنج خۆله‌كان ل سه‌ر ئێك بكه، هه‌م باشه دێ بیته ئه‌گه‌ر بۆ پاقژكرنا سیهێن ته هه‌م ژى دێ دلێ ته ژ جگاره‌یان ره‌ش كه‌ت.
ل گۆڕه‌یى وان بسۆران چێكرنا هه‌ڤالان بۆ هێلانا جگارێ هه‌سته‌كێ دى یێ هه‌ڤركیێ په‌یدا دكه‌ت و ئه‌گه‌ر تو ل گه‌ل دو تا سێ هه‌ڤالێن جگاركێش ده‌ركه‌ڤى و خۆ ب هنده‌ك كارێن دى ڤه مژوول كه‌ن وه‌ك هه‌ڤڕكى بۆ هێلانا جگارێ دێ كاره‌كێ باش بیت.
هه‌رده‌م ژى شاره‌زا هنده‌ك خالێن ڤه‌شارتى دبێژن ژ وان ژى هه‌رده‌م بیژه ئه‌گه‌ر ئه‌ز جگاره‌یان بهێلم دێ پاره‌یه‌ك ل به‌رده‌ستێ من مینیت، دێ وى پاره‌یى بۆ كاره‌كێ باشتر بكارئینم، ساخله‌میا من دێ باشتر بیت، دێ خۆ و خێزانا خۆ ژ دویكلا پیس یا جگارێ پارێزم و ده‌هان گۆتنێن دى هه‌نه ئه‌گه‌ر تو یی رژد بى تو ژى هنده‌كان لێ زێده‌كه و هاریكاریا خۆ بكه و جگارێ بهێله نه چ شۆله.
