ئه‌ردۆگان: دێ سكالایێ ل سه‌ر ئیسرائیلێ تۆماركه‌ین
بەلاڤ بکە
گاڤ
سه‌رۆككۆمارێ توركیا راگه‌هاند كو توركیا و پتر ژ 2 هزار پارێزه‌ر دێ سكالایێ ل سه‌ر ئیسرائیلێ ژ به‌ر تاوانێن وێ ل كه‌رتێ غه‌زه تۆماركه‌ن.
ره‌جه‌ب ته‌یب ئه‌ردۆگان ئه‌ڤرۆ شه‌مبیێ گۆتاره‌ك د خۆلا 62 یا ده‌سته‌یا گشتى یا ئێكه‌تیا قۆتابیێن توركیا دا ل سته‌نبۆلێ پێشكێشكر و تێدا داخوازا لێكۆلینێ ل گه‌ل ئیسرائیلێ كر.
ئه‌ردۆگان راگه‌هاند "ئه‌م دێ ل گه‌ل پتر ژ 2 هزار پارێزه‌ران سكالایه‌كێ پێشكێشى لایه‌نێن په‌یوه‌ندیدار ژ به‌ر كۆمكۆژیا ل غه‌زه كه‌ین، ئه‌م تا دویماهیێ دێ ل دویڤ بابه‌تى چین و ئیسرائیل دێ خویكا كارێن خۆ ده‌ت".
ديار ژى كر "جهێ داخێ یه وه‌لاتێن ئیسلامى نه‌شێن چ هه‌لویستان ژ كێشه‌یێن سه‌ره‌كى وه‌كى كێشه‌یا قودسێ وه‌ربگرن، تاوانێن ئیسرائیلێ ژ به‌ر بێخه‌میا وه‌لاتێن ئیسلامى رویدده‌ن".
سه‌رۆكێ توركیا زێده ژى كر "تیرۆرا ده‌وله‌تێ و داگیركرن ئه‌وا ئیسرائیل ل غه‌زه و باژێڕێن دى یێن فله‌ستینى ئه‌نجامدده‌ت، تاوانێن دژى مرۆڤایه‌تیێ نه و كۆمكۆژى نه".
سه‌رۆكێ توركیا به‌رى نوكه ژى ئیسرائیل ب وه‌لاته‌كێ تیرۆرستى بناڤكربوو، ئه‌و چه‌نده ببوو جهێ نه‌رازیبوونا بێنیامین نه‌ته‌نیاهۆ سه‌رۆكوه‌زیرێ ئیسرائیلێ و وى ژى ده‌ستهه‌لاتا توركى ب بۆمبه‌بارانكرنا گوندێن توركیا تۆمه‌تباركربوو.
